દિલ્હી: પર્યાવરણવાદી અને લદ્દાખના પ્રખ્યાત કાર્યકર સોનમ વાંગચુકનું 20 મા દિવસે પણ આમરણ અનશન ચાલુ રહ્યું છે. દિલ્હી પોલીસે તેમને જંતર-મંતરથી સફદરજંગ હોસ્પિટલમાં ખસેડ્યા છે, ત્યાં પણ તેમણે ગ્લુકોઝ કે ઈલેક્ટ્રોલાઈટ પાઉડર લેવાનો ઇનકાર કરી દીધો છે.
હોસ્પિટલ સૂત્રોએ જણાવ્યું છે કે વાંગચુકની સ્થિતિ સ્થિર છે, પરંતુ તેઓ માત્ર મીઠાવાળા પાણી પર જ આધારિત છે. તેમની પત્ની ગીતાંજલિએ મેડિકલ રિપોર્ટ પર શંકા વ્યક્ત કરી છે અને કહ્યું છે કે તેઓ તેના પર વિશ્વાસ કરતા નથી. ગીતાંજલિએ સ્પષ્ટ જાહેરાત કરી છે કે 20 જુલાઈએ પ્રસ્તાવિત સંસદ માર્ચ યથાવત રહેશે. તેમણે કહ્યું, “માર્ચ થઈને જ રહેશે.”
સોનમ વાંગચુક લદ્દાખના પર્યાવરણ અને જમીનના અધિકારો માટે લાંબા સમયથી આંદોલન કરી રહ્યા છે. તેમના આ અનશનને લઈને વિવિધ સામાજિક અને રાજકીય વર્તુળોમાં ચર્ચાઓ ચાલી રહી છે. હાલમાં તેમના સ્વાસ્થ્યને લઈને ચિંતા વ્યક્ત કરવામાં આવી રહી છે.
