ચીખલી: આજરોજ કેબિનેટ મંત્રી નરેશ પટેલ અને સાંસદની ઉપસ્થિતિમાં ચીખલી તાલુકાના ઘોલાર ખાતે નવા ગ્રામ પંચાયત ભવનના નિર્માણ કાર્યનો પ્રારંભ કરવામાં આવ્યો, જે ગામના વહીવટી તંત્રને વધુ સુસજ્જ બનાવશે. બામણવાડાથી આમધરા જોડતા માર્ગના કાર્યનું ખાતમુહૂર્ત થતા સ્થાનિક લોકોને સરળ અને સુગમ આવાગમનની સુવિધા મળશે.
Decision News ને મળેલી માહિતી મુજબ બામણવાડા વિસ્તારમાં નવજાગૃતિ પ્રાથમિક શાળા, આમધરા ખાતે નવા ઓરડાના બાંધકામનું કાર્ય શરૂ કરવામાં આવ્યું, જે વિદ્યાર્થીઓને વધુ સારી શૈક્ષણિક સુવિધાઓ ઉપલબ્ધ કરાવશે. ઉપરાંત ચીખલી તાલુકાના આમધરા મોટી કોળીવાડ વિસ્તારમાં નવા આંગણવાડી મકાનના બાંધકામનું ખાતમુહૂર્ત કરવામાં આવ્યું, જે નાના બાળકો અને માતાઓ માટે લાભદાયી સાબિત થશે.
ખાંભડા ગામે ખાડી ફળિયા બાલમંદિરથી પ્રકાશભાઈ ઉકાભાઈના ઘર તરફ જતો માર્ગ બનાવવાના કાર્યનો પ્રારંભ પણ કરવામાં આવ્યો, જેના પરિણામે ગામના આંતરિક પરિવહનને વધુ સુવિધાજનક બનાવાશે. આ તમામ કાર્યો ગ્રામ વિકાસને નવી ગતિ આપતા અને લોકોના જીવનસ્તરને ઊંચું લાવવાના દિશામાં મહત્વપૂર્ણ સાબિત થશે.
