કેવડિયા ખાતે વિશ્વની સૌથી ઊંચી પ્રતિમા સ્ટેચ્યુ ઓફ યુનિટીના નિર્માણ બાદ પ્રવાસીઓના વધુ આકર્ષણ માટે ત્યાં પ્રવાસનને લગતા અન્ય પ્રોજેક્ટો પણ હાથ ધરાયા છે. ત્યારે સ્ટેચ્યુ ઓફ યુનિટીની આડમાં એ વિસ્તારમાં ગેરકાયદેસર માટી ખોદાતી હોવાની બુમો ઉઠી હતી. લોકોની રજૂઆત બાદ નર્મદા જિલ્લા ખાણ ખનીજ વિભાગે એ વિસ્તારમાં ડ્રોનથી સર્વે હાથ ધરી કાર્યવાહી હાથ ધરી હતી.
સ્ટેચ્યુ ઓફ યુનિટી નજીકના ગભાણા ગામના એક ખેતરમાં ગેરકાયદેસર રીતે માટી ખોદાતી હોવાની જાણ થતા સ્થાનિકોએ હોબાળો મચાવતા પોલિસ ઘટનાસ્થળે આવી પહોચી હતી. ગ્રામજનોની ફરિયાદને પગલે જ્યાં માટીનું ખોદકામ થયું હતું એનાથી થોડેક દૂરથી એક ટ્રકને જપ્ત કરી કરી પોલીસે કાર્યવાહી હાથ ધરી હતી. આ ઘટનાની જાણ વાયુવેગે ફેલાતા નર્મદા જિલ્લા ખાણ ખનીજ વિભાગના અધિકારીઓ સહિત અન્ય અધિકારીઓ ઘટના સ્થળે દોડી આવ્યા હતા. ગભાણા ગામમાં જ્યાં ખોદકામ થયું છે ત્યાં તલાટી અને ખાણ ખનીજ વિભાગના અધિકારીઓએ સર્વે હાથ ધરી રિપોર્ટ નર્મદા જિલ્લા ભૂસ્તરશાસ્ત્રી કે.જે.રાજપુરાને સુપ્રત કર્યો હતો.
કેવડિયા કોઠી ગ્રુપ ગ્રામ પંચાયતના તલાટી કુલદીપ તડવીએ જણાવ્યું હતું કે, ગભાણા ગામમાં જે માટી ખોદાઈ છે એની ગ્રામપંચાયતને કોઈ પણ પ્રકારની જાણ નથી કે અમે કોઈ પરમિશન પણ નથી આપી. નર્મદા જિલ્લા ભૂસ્તરશાસ્ત્રી કે.જે.રાજપુરાએ જણાવ્યું હતું કે, અમારી ટીમ ત્યાં તાત્કાલિક પહોંચી ગઈ હતી અને સર્વેની કામગીરી હાથ ધરી છે, પણ ઘટના સ્થળ પરથી અમને કોઈ વાહન મળ્યું નથી પણ થોડેક દુરથી એક ટ્રક પોલિસે જપ્ત કરી છે એને સિઝ કરવાની કાર્યવાહી હાથ ધરાઈ છે. RTO પાસેથી ટ્રક માલિકનું નામ જાણી નોટિસ અપાશે અને જ્યાં માટી ખોદાઈ છે એ જમીન માલિકની પણ માહિતી એકઠી કરાશે અને ગેરકાયદેસર જણાશે તો કાર્યવાહી હાથ ધરાશે.
નીચે આપેલી લીંક પર ક્લિક કરીને જોડાઓ ડીસીઝન ન્યૂઝ સાથે. લાઇક, સેર અને ફોલો કરી શકો છો.
