ગુજરાત: પોલીસ પરિવારના બહેનો બેનર લઈ કોંગ્રેસના ધારાસભ્ય જિગ્નેશ મેવાણીનો વિરોધ કરી રહ્યા છે. તેઓ જિગ્નેશ મેવાણીનું રાજીનામું માંગી રહ્યા છે. હાય હાય કરી રહ્યા છે. 24 નવેમ્બર 2025ના રોજ થરાદમાં વેપારીઓએ જિગ્નેશ મેવાણીના વિરોધમાં દુકાનો પણ બંધ કરી દીધી હતી.
શું જિગ્નેશ મેવાણીએ બળાત્કાર/ હત્યા/ ઠગાઈ/ વિશ્વાસઘાત/ ખંડણીનો ગુનો કર્યો છે? ના. તો શામાટે પોલીસ પરિવાર દ્વારા તેમની સામે ભારે આક્રોશ વ્યક્ત થઈ રહ્યો છે? જિગ્નેશ મેવાણીએ પોલીસના પટ્ટા ઊતરાવી લેવાનું કહ્યું એટલે ? પરંતુ ક્યા પોલીસના પટ્ટા ઊતરાવી લેવાનું જિગ્નેશ મેવાણીએ કહેલ? જે દારુના ધંધા ચલાવે છે, જે ડ્રગ્સના ધંધા ચલાવે છે તેના પટ્ટા ઉતારવાની વાત કરી હતી. આમાં ખોટું શું કહ્યું હતું?
શું પોલીસ પરિવારની આ મહિલાઓ દારુ/ ડ્રગ્સ વેચાય તેવું ઈચ્છે છે? નાયબ મુખ્યમંત્રી હર્ષ સંઘવી પણ આવું ઈચ્છતા હશે ? શું સરકારની સૂચના વિના આવી રેલી નીકળે ખરી? જો કોઈ શિક્ષિત બેરોજગારોએ રોજગાર માટે રેલી કાઢવી હોય તો પોલીસ મંજૂરી આપે? શું ખેડૂતોને/ શ્રમિકોને/ આંગણવાડી બહેનોને રેલી કાઢવી હોય તો પોલીસ મંજૂરી આપે?
સરકારી-ચાપલૂસ મીડિયા એક સૂરે ‘જિગ્નેશ મેવાણીના વાણી વિલાસ’નો નેરેટિવ ચલાવી રહ્યું છે? મીડિયા કહે છે કે આવતીકાલે નાયબ મુખ્યમંત્રી હર્ષ સંઘવી પોલીસ પરિવારની મુલાકાત લેશે ! ટૂંકમાં, સરકાર અને તેમના ચાપલૂસ મીડિયાએ જિગ્નેશ મેવાણીની કારકિર્દી ખતમ કરવા કમર કસી છે. આખરે સરકારે પોલીસ પરિવારને મેદાનમાં ઊતાર્યો ! એટલું જ નહી, હર્ષ સંઘવી દ્વારા ટીવી ચેનલો/ સ્વતંત્ર ન્યૂઝ પોર્ટલને ફોન કરીને જિગ્નેશ મેવાણી સામે ઝૂંબેશ કરવા દબાણ થઈ રહ્યું છે. ગુજરાતી મીડિયાને જોશો તો આ મોડસ ઓપરેન્ડી દેખાઈ આવશે ! કેવું કાવતરું !
સરકારમાં શરમ જેવું કંઈ હશે જ નહીં? ગુજરાતનું એક ગામ બતાવો જ્યાં દારૂ મળતો ન હોય? ગુજરાતનું એક શહેર બતાવો જ્યાં ડ્રગ્સ વેચાતું ન હોય? કંડલા અદાણી બંદર પરથી જે જથ્થાબંધ ડ્રગ્સ પકડાય છે તે શું પાકિસ્તાન મોકલવા મંગાવાય છે? ગુજરાતનું એકપણ પોલીસ સ્ટેશન બતાવો જ્યાં નાગરિક નિર્ભય બની ફરિયાદ કરવા જતો હોય? શું ગુજરાત પોલીસના ક્લાસ વન અધિકારીના પત્ની કે બહેન પોલીસ સ્ટેશને નિર્ભય બની ફરિયાદ કરવા જઈ શકે છે?
થોડા સમય પહેલા રાજુલા જાફરાબાદના ભાજપના ધારાસભ્ય હીરાભાઈ સોલંકીએ પોલીસ સ્ટેશનની અંદર પોલીસને પટ્ટા ઉતારવાની ધમકી આપેલ ત્યારે આ આ મહિલાઓ કેમ ચૂપ રહી હશે? વિપક્ષી ધારાસભ્ય બોલે તો જ આ મહિલાઓ બહાર નીકળતી હશે? શું પોલિસ પરિવારની આ મહિલાઓ એવું ઈચ્છે છે કે એમના પેટજણ્યા દીકરાઓ ડ્રગ્સ ઓવરડોઝના લીધે નાની ઉંમરે મૃત્યુ પામે? શું આ મહિલાઓને પોતાની આસપાસના વ્યસની પુરુષોના ઘરની હજારો પીડિત મહીલાઓ નહીં દેખાતી હોય? આમાની ઘણી મહિલાઓ તો પોતે જ પીડિતા નહીં હોય? સરકારની ચાપલૂસી પોલીસ તો કરે જ છે આ મહિલાઓએ ચાપલૂસી કરવાની શી જરુર છે? શરમ કરો નાયબ મુખ્યમંત્રી ! અણસમજુ મહીલાઓનો તમારા રાજકારણ માટે દુરૂપયોગ શા માટે કરો છો?
પોલીસ પરિવારની બહેનોને પૂછવું છે શું ‘પોલીસ કલ્યાણ’ની પ્રવૃતિઓ પોલીસ હેડ ક્વાર્ટરમાં થાય છે ખરી? પોલીસ વેલફેરની જોગવાઈ ગુજરાત પોલીસ મેન્યુઅલ, ભાગ-1, નિયમ-256 હેઠળ દરેક શહેર/જિલ્લા/યુનિટમાં પોલીસ વેલ્ફેર ફંડની જોગવાઈ છે. જેમાં દર વર્ષે દરેક કોન્સ્ટેબલથી લઈ પોલીસ અધિકારીઓનો એક દિવસનો પગાર ફરજિયાત જમા થાય છે. પોલીસ પરિવારના વિકાસ માટે, સગવડતાઓ માટે આ ફંડ વાપરવાનું હોય છે; પરંતુ પોલીસ કમિશ્નર/ જિલ્લા પોલીસ વડા/કમાન્ડન્ટ ભાગ્યે જ તાબાના પોલીસ કર્મચારીઓની તકેદારી/ સંભાળ લે છે. એટલે આ વેલ્ફેર ફંડ વપરાયા વિના પડ્યું રહે છે. આ ફંડ તમારા માટે/ તમારા બાળકો માટે વપરાય તેની ચિંતા પ્રથમ કરો, પછી જિગ્નેશ મેવાણીનો વિરોધ કરજો. નાયબ મુખ્યમંત્રી હર્ષ સંઘવી પોલીસ પરિવારની મુલાકાતે આવે ત્યારે પોલીસ વેલ્ફેર માટે આ સરકારે 2001થી 2025 દરમિયાન શું કામગીરી કરી? તેનો હિસાબ માંગજો અને જો હિમ્મત અને સ્વમાન હોય તો પોલીસના યુનિયન માટે મંજૂરી આપવા તેમને કહેજો !
વિચિત્રતા તો જૂઓ, જે સરકાર પોલીસ યુનિયનની મંજૂરી આપતી નથી તેમના પરિવારની મહિલાઓને વિપક્ષના ઘારાસભ્ય સામે આંદોલનકારી બનાવી છે !
BY: રમેશ સવાણી
