ગુજરાતમાં હવામાન વિભાગની આગાહીને પગલે રાજ્યભરમાં વરસાદી માહોલ છવાયો છે. રાજ્યમાં આગામી પાંચ દિવસ ભારે વરસાદ થવાની પણ આગાહી કરવામાં આવી છે. જ્યારે 6 જિલ્લામાં ઓરેન્જ એલર્ટ અને 20 જિલ્લામાં આજે યેલો એલર્ટ આપવામાં આવ્યું છે.
ત્યારે વલસાડ જિલ્લામાં મોડી રાતથી મેઘરાજા ધમાકેદાર બેટિંગ કરી રહ્યાં છે. જિલ્લામાં સૌથી વધુ કપરાડામાં 6.8 ઇંચ વરસાદ વરસ્યો છે. જ્યારે વલસાડમાં પણ 6.4 ઇંચ વરસાદ ખાબક્યો છે. ભારે વરસાદના પગલે મધુબન ડેમના 7 દરવાજા રાત્રે 1 વાગ્યે ખોલવામાં આવ્યાં છે. જ્યારે કપરાડાના બૂરલા ગામે કોલક નદી ઉપર બનાવેલો લો લેવલ પુલ પાણીમાં ગરકાવ થતાં ચારથી પાંચ ગામો સંપર્ક વિહોણા થયા છે.
વલસાડ જિલાના તાલુકા પ્રમાણે વરસાદી આંકડાની વાત કરીએ તો ઉમરગામ- 65 mm (2.6 ઇંચ), કપરાડા- 152 mm (6.8 ઇંચ), ધરમપુર- 71 mm (2.84 ઇંચ), પારડી- 85 mm (3.4 ઇંચ), વલસાડ- 160 mm (6.4 ઇંચ), વાપી- 67 mm (2.68 ઇંચ)
ભારે વરસાદના પગલે મધુબન ડેમનું લેવલ 78.70 મીટર નોંધાયું છે. મધુબન ડેમના ઉપરવાસમાં પડી રહેલા ભારે વરસાદને કારણે ડેમમાં વરસાદી પાણીની આવક વધી રહી છે. ડેમમાં છેલ્લા 8 કલાકમાં ડેમના ઉપરવાસમાં 398.62 mm (15.94 ઇંચ) વરસાદ પડ્યો છે. જેને લઈને ડેમમાંથી રાત્રે 1 વાગ્યાથી સવારે 8 વાગ્યા સુધીમાં ડેમના 7 દરવાજા 2 મીટર ખુલ્લા રાખીને 8 લાખ 95 હજાર 345 ક્યુસેક પાણી દમણ ગંગા નદીમાં છોડવામાં આવ્યું હતું.
જેને લઈને સેલવાસ, વલસાડ અને દમણના વહીવટી તંત્રની એલર્ટ કરી દેવામાં આવ્યા હતા. જ્યારે ડિઝાસ્ટર વિભાગે દમણ, સેલવાસ અને વલસાડ જિલ્લાના વાપી અને ઉમરગામના લોકોને નદીના તટ થઈ દૂર રહેવા અને એલર્ટ રહેવા સૂચના આપવામાં આવી છે.
