તાપી: કોઈ પરિવાર માટે ઘર માત્ર ઈંટ-પથ્થરની ઇમારત નથી હોતું, પરંતુ તેમાં વર્ષોની મહેનત, લાગણીઓ અને અનેક સપનાઓ વસેલાં હોય છે. તાપી જિલ્લાના વાલોડ તાલુકાના અલગટ ગામે બનેલી એક હૃદયદ્રાવક ઘટનાએ આ વાત સાબિત કરી દીધી છે. 6 નવેમ્બર, 2026ના રોજ રાત્રિના સમયે શોર્ટ સર્કિટના કારણે સ્વ. જયેશભાઈ ભગુભાઈ ચૌધરીના ઘરમાં ભીષણ આગ લાગતાં આખું ઘર અને ઘરવખરી બળીને ખાક થઈ ગઈ હતી. આ દુર્ઘટનામાં રશ્મિકાબેન જયેશભાઈ ચૌધરી અને તેમના 10 વર્ષના પુત્ર કુંજ સામે જીવન ફરીથી શરૂ કરવાનો મોટો પડકાર ઊભો થયો હતો.
આ દુઃખદ ઘટનાની જાણ થતાં જ GLOBAL GRAMIN VIKAS TRUST (GGVT) ના સહસ્થાપક ટ્રસ્ટી અને સચિવ મનહરભાઈ ધોડિયા પરિવારની મદદ માટે ત્વરિત આગળ આવ્યા હતા. ટ્રસ્ટ દ્વારા પરિવારને ૧૫ દિવસ ચાલે તેટલી અનાજની કીટ, ધાબળા અને રોકડ સહાય પૂરી પાડવામાં આવી છે.
આ સાથે જ માત્ર તાત્કાલિક રાહત પૂરતું મર્યાદિત ન રહેતા, પરિવાર ફરીથી પોતાના ઘરમાં સુરક્ષિત જીવન જીવી શકે તે માટે નવું ઘર બનાવવાની દિશામાં મહત્વપૂર્ણ પહેલ શરૂ કરવામાં આવી છે. એટલું જ નહીં, 10 વર્ષના બાળક કુંજના ભવિષ્યને અંધકારમય થતું અટકાવવા માટે તેના સંપૂર્ણ શિક્ષણની જવાબદારી પણ GGVT દ્વારા સ્વીકારવામાં આવી છે. મનહરભાઈ ધોડિયાની આ પહેલ માનવતા અને સામાજિક જવાબદારીનો ઉત્તમ સમન્વય દર્શાવે છે.
ઘટનાની ગંભીરતા જોતાં સમસ્ત આદિવાસી સમાજ, ગુજરાત રાજ્યના મહામંત્રી તેજસ પટેલે પણ પરિવારની મુલાકાત લીધી હતી. તેમણે પીડિત પરિવારને સાંત્વના પાઠવી હતી અને આ મુશ્કેલ સમયમાં સમગ્ર સમાજ તેમની પડખે ઊભો રહેશે તેવો દ્રઢ વિશ્વાસ અપાવ્યો હતો.
તેજસ પટેલે મનહરભાઈ ધોડિયા અને GGVT દ્વારા લેવાયેલા આ માનવતાવાદી પગલાંને બિરદાવી આભાર વ્યક્ત કર્યો હતો. તેમણે જણાવ્યું હતું કે, “સમાજની એકતાની સાચી ઓળખ ત્યારે જ થાય છે જ્યારે આપણા જ પરિવાર પર સંકટ આવે અને આપણે ભેદભાવ ભૂલીને સહયોગ માટે આગળ આવીએ.” તેજસ પટેલ અને મનહરભાઈ ધોડિયાએ સમગ્ર આદિવાસી સમાજના આગેવાનો, સામાજિક સંસ્થાઓ, યુવાનો અને સેવાભાવી દાતાઓને આ પરિવારની મદદે આગળ આવવા હૃદયપૂર્વક અપીલ કરી છે.
દરેક નાનું-મોટું યોગદાન આ પરિવાર માટે નવી આશાનું કિરણ બની શકે છે. આજના આ સંકટના સમયે એક પરિવારનું ઘર ફરીથી વસાવવા, એક બાળકનું ભવિષ્ય સંવારવા અને સમાજની એકતાને સાચા અર્થમાં ચરિતાર્થ કરવા સૌએ સાથે મળીને આગળ આવવું પડશે.
