ડીસીઝન વિશેષ: આજના આધુનિક યુગમાં જ્યાં તબીબી સુવિધાઓ અને મોટા દાવાઓ વચ્ચે પણ સ્વાસ્થ્ય સેવાઓ સામાન્ય લોકો માટે મોંઘી બની રહી છે, ત્યારે કોઈ પણ મેડિકલ ડિગ્રી કે આધુનિક સાધનો વગર માત્ર પોતાના અનુભવ, પારંપરિક જ્ઞાન અને સમર્પણ ભાવથી 1500 થી વધુ બાળકોની સુરક્ષિત પ્રસૂતિ કરાવનાર ‘લોકમાતા’ પદ્મશ્રી સુલાગિટ્ટી નરસમ્માની જીવનસફર સમગ્ર દેશ માટે અદભુત અને પ્રેરણાદાયી ઉદાહરણ છે.
માત્ર 20 વર્ષની નાની ઉંમરે માનવ સેવાનો સંકલ્પ લઈને નીકળેલા સુલાગિટ્ટી નરસમ્માએ અંતરિયાળ અને ગરીબ ગામડાઓમાં જ્યાં તબીબી સુવિધાઓનો અભાવ હતો, ત્યાં મહિલાઓ માટે સાચા અર્થમાં ‘લાઇફલાઇન’ બનીને કામ કર્યું. જે જમાનામાં ગામડાઓમાં હોસ્પિટલ પહોંચવું મુશ્કેલ હતું, ત્યારે તેમણે રાત-દિવસ જોયા વગર ગર્ભવતી મહિલાઓની સુવાવડ કરાવીને હજારો માતા અને શિશુઓના જીવ બચાવ્યા હતા.
નરસમ્માની સૌથી મોટી વિશેષતા એ હતી કે તેમણે સાત દાયકા (70 વર્ષ) સુધી આ સેવા યજ્ઞ ચાલુ રાખ્યો અને તેના બદલામાં ક્યારેય એક પણ રૂપિયો ફી તરીકે લીધો નહીં. નિઃસ્વાર્થ ભાવે અને માનવતાના ધોરણે કરવામાં આવેલી આ કામગીરીના કારણે જ ગ્રામજનો તેમને પ્રેમ અને આદરથી ‘લોકમાતા’ તરીકે ઓળખવા લાગ્યા.
તેમના આ અપ્રતિમ અને અવિસ્મરણીય પ્રદાનની નોંધ દેશ-વિદેશમાં લેવાઈ હતી. કોઈ પણ ઔપચારિક મેડિકલ શિક્ષણ ન હોવા છતાં, તેમના આ જ્ઞાન અને સેવા માટે: વર્ષ 2014 માં તેમને ‘માનદ ડોક્ટરેટ’ (Honorary Doctorate) ની પદવીથી સન્માનિત કરવામાં આવ્યા હતા. વર્ષ 2018માં ભારત સરકાર દ્વારા તેમને દેશના ચોથા સર્વોચ્ચ નાગરિક સન્માન ‘પદ્મશ્રી’ થી નવાજવામાં આવ્યા હતા. અન્ય કોઈ સાધન કે સુવિધા વિના માત્ર સેવાભાવ અને પરંપરાગત અનુભવથી હજારો જીવન બચાવનાર પદ્મશ્રી સુલાગિટ્ટી નરસમ્માનું જીવન આજના યુગ માટે સમર્પણ અને માનવસેવાનું એક અમર ઉદાહરણ બની રહેશે.
