નાનાપોંઢા: ગતરોજ નાનાપોંઢા તાલુકાની ઓઝરડા બારી ફળિયા પ્રાથમિક શાળામાં રાજ્ય સરકારના શાળા પ્રવેશોત્સવ કાર્યક્રમ અંતર્ગત ઉત્સાહભેર શાળા પ્રવેશોત્સવની ઉજવણી કરવામાં આવી હતી. કાર્યક્રમમાં નવપ્રવેશિત બાળકોનું ઉષ્માભર્યું સ્વાગત કરવામાં આવ્યું હતું અને શિક્ષણ પ્રત્યે સકારાત્મક વાતાવરણ સર્જાયું હતું.
આ પ્રસંગે મુખ્ય મહેમાન તરીકે જિલ્લા પંચાયત સદસ્ય તૃપ્તિબેન દિનેશભાઈ ધનારીયા તેમજ લાયઝન ઓફિસર અને સી.આર.સી. કો-ઓર્ડિનેટર રેખાબેન એમ. સરિયા ઉપસ્થિત રહ્યા હતા. મહાનુભાવોએ બાળકોને શુભેચ્છાઓ પાઠવી હતી અને શિક્ષણના મહત્વ અંગે વાલીઓ તથા ગ્રામજનોને માર્ગદર્શન આપ્યું હતું. શાળા પ્રવેશોત્સવ અંતર્ગત બાલવાટિકામાં 19 બાળકો, ધોરણ-6માં 10 બાળકો, ધોરણ-1માં 1 બાળક તેમજ ધોરણ-2માં 1 બાળકને નવા પ્રવેશ આપવામાં આવ્યા હતા. નવ પ્રવેશિત વિદ્યાર્થીઓને તિલક કરી, ફૂલહાર પહેરાવી તેમજ શૈક્ષણિક કીટ અર્પણ કરીને તેમનું ભવ્ય સ્વાગત કરવામાં આવ્યું હતું. બાળકોના ચહેરા પર આનંદ અને ઉત્સાહ સ્પષ્ટપણે જોવા મળ્યો હતો.
કાર્યક્રમ દરમિયાન મહાનુભાવોએ બાળકો સાથે સંવાદ સાધ્યો હતો અને નિયમિત અભ્યાસ, સ્વચ્છતા તેમજ સંસ્કારપૂર્ણ શિક્ષણ અંગે પ્રેરણાદાયી માર્ગદર્શન આપ્યું હતું. વાલીઓને પોતાના બાળકોને નિયમિત શાળાએ મોકલવા અને તેમના શૈક્ષણિક વિકાસમાં સહભાગી બનવા અનુરોધ કરવામાં આવ્યો હતો. આ કાર્યક્રમમાં શાળા વ્યવસ્થાપન સમિતિ (એસ.એમ.સી.)ના સદસ્યો, વાલીઓ, ગ્રામજનો તેમજ શાળાના શિક્ષકો મોટી સંખ્યામાં હાજર રહ્યા હતા. સૌના સહયોગથી સમગ્ર કાર્યક્રમ સફળતાપૂર્વક સંપન્ન થયો હતો.
અંતમાં શાળાના આચાર્ય ડૉ. બાબુ ચૌધરીએ ઉપસ્થિત મહાનુભાવો, એસ.એમ.સી.ના સદસ્યો, વાલીઓ, ગ્રામજનો અને શાળા પરિવારનો આભાર વ્યક્ત કર્યો હતો. તેમણે જણાવ્યું હતું કે શાળા પ્રવેશોત્સવ માત્ર એક કાર્યક્રમ નહીં પરંતુ બાળકોના ઉજ્જવળ ભવિષ્ય તરફનું પ્રથમ પગથિયું છે. કાર્યક્રમના સફળ આયોજનથી સમગ્ર ગામમાં શિક્ષણ પ્રત્યે જાગૃતિ અને ઉત્સાહનો માહોલ સર્જાયો હતો.
