વ્યારા: શિક્ષણ ક્ષેત્રે કારકિર્દી બનાવવા ઈચ્છતા યુવાનો માટે પ્રેરણારૂપ ઘટના સામે આવી છે. મૂળ ગ્રામિણ વિસ્તારના પ્રતિભાશાળી યુવાન ડૉ. દિલીપ એમ. ચૌધરીની નવસારી સ્થિત પ્રતિષ્ઠિત શૈક્ષણિક સંસ્થા એસ.બી. ગાર્ડા આર્ટ્સ એન્ડ પી.કે. પટેલ કોલેજ ઓફ કોમર્સમાં આસિસ્ટન્ટ પ્રોફેસર તરીકે નિમણૂક થતાં પરિવારજનો, મિત્રવર્તુળ અને સમગ્ર જુના કાકરાપાર ગામમાં આનંદની લાગણી છવાઈ ગઈ છે.
ડૉ. દિલીપ ચૌધરીએ નાનપણથી જ અભ્યાસ પ્રત્યે વિશેષ લગાવ રાખ્યો હતો. સતત મહેનત, સંઘર્ષ અને લગનના બળ પર તેમણે પીએચ.ડી. (Ph.D.) સુધીનો શૈક્ષણિક પ્રવાસ સફળતાપૂર્વક પૂર્ણ કર્યો હતો. તેમના જ્ઞાન, વિદ્વત્તા અને વિષય પરની મજબૂત પકડને ધ્યાનમાં રાખીને ગાર્ડા કોલેજ જેવી જાણીતી સંસ્થાએ તેમને આસિસ્ટન્ટ પ્રોફેસર તરીકે પસંદ કર્યા છે.
તેમની આ સિદ્ધિ બદલ તેમના નિવાસસ્થાને શુભેચ્છકો અને ગામલોકોની અવરજવર શરૂ થઈ ગઈ હતી. પરિવારજનોએ મીઠાઈ વહેંચી ખુશી વ્યક્ત કરી હતી. ગામના અગ્રણીઓએ જણાવ્યું હતું કે, “ડૉ. દિલીપે માત્ર પોતાના પરિવારનું નહીં પરંતુ સમગ્ર ગામનું નામ રોશન કર્યું છે. સામાન્ય પરિવારમાંથી આવીને ઉચ્ચ શિક્ષણ ક્ષેત્રે પ્રોફેસર બનવું એ આજના યુવાનો માટે પ્રેરણાસ્રોત સમાન છે.”
સોશિયલ મીડિયા તેમજ રૂબરૂ મુલાકાતો દ્વારા મિત્રો, સ્નેહીજનો અને શિક્ષણજગત સાથે જોડાયેલા લોકો ડૉ. દિલીપ ચૌધરીને નવી જવાબદારી માટે શુભકામનાઓ પાઠવી રહ્યા છે. શિક્ષણવિદોએ આશા વ્યક્ત કરી છે કે તેમના જ્ઞાન અને અનુભવનો લાભ આગામી પેઢીના વિદ્યાર્થીઓને મળશે અને તેઓ શિક્ષણક્ષેત્રે વધુ ઊંચાઈઓ સર કરશે.
