ભાવનગર: નમો ડ્રોન દીદી યોજના એ મહિલા સશક્તિકરણ અને કૃષિ ક્ષેત્રે ક્રાંતિ લાવવાની એક મહત્વાકાંક્ષી પહેલ છે. જેનો લાભ મેળવીને આજે ગ્રામ્ય વિસ્તારની અનેક મહિલાઓ ‘ડ્રોન દીદી’ બની છે. ત્યારે ભાવનગર જિલ્લાના પાલિતાણા તાલુકાના છેવાડાનાં નાના પાણીયાળી ગામના વતની અને ‘નમો ડ્રોન દીદી’ તરીકે ઓળખાતાં મીરાંબેન રાઠોડ અને તેમના જેવા અન્ય ડ્રોન દીદી ખેતરમાં ડ્રોનથી દવાનો છંટકાવ કરીને દર વર્ષે દોઢથી બે લાખની કમાણી કરી રહ્યાં છે.
મીરાંબેને પોતાની સફળતાની વાત કરતાં કહ્યું કે, અમારી પાસે બે વીઘા જમીન એટલે મને સતત એવું થયાં કરે કે, મારે શિક્ષણની સાથે સાથે રોજગારી મેળવી આત્મનિર્ભર બનવું છે. કહેવાય છે ને કે, વિજેતાઓ કોઈ અલગ કામ નથી કરતા, તેઓ દરેક કામ અલગ રીતે કરે છે તે વાત મારા મનન પર સતત રમ્યાં કરતી હતી. તાલીમ બાદ G.N.F.C દ્વારા મને ડ્રોન આપવામાં આવ્યું એ ડ્રોન મારા તાલુકા મથક સુધી પહોંચતું કર્યું,જેમાં મારે એકપણ રૂપિયાનો ખર્ચ થયો નથી.
અમે ભાવનગર જિલ્લાના ગ્રામ્ય વિસ્તારોમાં ડ્રોનથી દવાનો છંટકાવ કરીએ છીએ. એક એકરના રૂ.500 થાય પરંતુ ખેડૂતો પાસેથી અમે રૂ.100 લઈએ છીએ, રૂ.400 સબસિડીના માધ્યમથી સરકાર અમને આપે છે. ખેતરમાં ડ્રોનથી દવાનો છંટકાવ કરીને દર વર્ષે દોઢથી બે લાખની કમાણી આરામથી થાય છે. પાલિતાણાની એન.આર.એલ.એમ. શાખામાંથી અમારા શિવમ સખી મંડળને રૂ.30 હજાર રિવોલ્વિંગ ફંડ. રૂ.2500નું સ્ટાર્ટઅપ ફંડ મળ્યું છે.એ પણ અમારા માટે મહત્વપૂર્ણ સાબિત થયું છે.
મીરાંબેને કહ્યું કે, સરકારની ડ્રોન દીદી યોજનાથી મારા જેવી અનેક મહિલા કમાણી કરતી થઈ છે. કેન્દ્ર અને રાજ્યની યોજના દ્વારા મહિલાઓ આત્મનિર્ભર બનવાની સાથે વિકસિત ભારતની સંકલ્પનાને ખરા અર્થમાં સાર્થક કરી યોગદાન આપતી થઇ ગઇ છે.
10 દિવસીય ડ્રોન પાયલોટ તાલીમ માટે વડોદરામાં મેળવી હતી. મીરાબહેને માહિતી આપતા જણાવ્યું હતુ કે અમારા તાલુકાના કલ્સ્ટર કો.ઓર્ડીનેટર તરીકે ફરજ બજાવતાં હરેશભાઈ વાઘેલાએ નમો ડ્રોન દીદી યોજનાની માહિતી આપી, ત્યારબાદ મેં જિલ્લા ગ્રામ વિકાસ એજન્સીનો રૂબરૂ સંપર્ક કરી આ યોજના અંગેની માહિતી મેળવી, આમ મને પ્રથમથી જ સરકારના વિવિધ વિભાગોનો સતત સહયોગ સાંપડતો રહ્યો.
G.F.N.C દ્વારા યોજાતી 10 દિવસીય ડ્રોન પાયલોટ તાલીમ માટે વડોદરા પહોંચી ત્યાં રીમોટથી ડ્રોન ઉડાડવાની તાલીમની સાથે પ્રેક્ટિકલ અને થીયરીનું જ્ઞાન પણ આપવામાં આવ્યું હતું. આ ઉપરાંત મને દાંતીવાડા ખાતે પણ 6 દિવસીય તાલીમ આપવામાં આવી, જેનાથી મને ખૂબ ફાયદો થયો.
