ખેરગામ: ગતરોજ ખેરગામ તાલુકા કોંગ્રેસ સમિતિ દ્વારા બાવળી ફળિયામાં ગૌચરણ જમીન પર દબાણ અને શરતભંગના આક્ષેપ સાથે જન આક્રોશ રેલીનું આયોજન કરી આગેવાનો દ્વારા તાત્કાલિક તપાસની માંગ કરી કડક કાર્યવાહી કરવા બાબતે મામલતદારને આવેદનપત્ર સોપવામાં આવ્યું હતું.
આવેદનપત્રના લેખન પ્રમાણે ખેરગામના બાવળી ફળિયામાં ગૌચરણ જમીનના ગેરવહીવટ, શરતભંગ, અને ગેરકાયદે વેચાણ રદ કરી જમીનને ગૌચર તરીકે જાહેર કરવા તાત્કાલિક કાર્યવાહી માટે મુખ્યમંત્રીને લેખિત રજૂઆત કરવામાં આવી હતી. ગામની જુની ગૌચરણ જમીન વર્ષો સુધી ગામના પશુઓના ચરાણ માટે ઉપયોગમાં લેવાતી આવી છે પરંતુ આ જમીન માજી સૈનિકને ફાળવાઈ, વર્ષો સુધી પડતર રહી અને પાછળથી વેચાણ થઈ ગઈ હોવાનું રજૂ કર્યું હતું. હાલ આ જમીન પર બાંધકામ અને બિનખેતી ફેરફાર થવાથી ગૌચરનો સીધો નાશ થયો છે, જેના કારણે ગરીબ અને જમીનવિહોણા આદિવાસી પશુપાલકોની આજીવિકા પર ગંભીર પ્રશ્ન ઊભો થયો છે. તાલુકા કોંગ્રેસ સમિતિએ આ મામલે તાત્કાલિક તપાસ કરાવી કાર્યવાહી તથા ગૌચર જમીન પાછી ખાલસા જાહેર કરવાની માંગ કરી છે.
આ પ્રસંગે ચીખલી વાંસદાના ધારાસભ્ય અનંત પટેલ, જિલ્લા કોંગ્રેસ પ્રમુખ શૈલેષભાઈ પટેલ, ખેરગામ તાલુકા કોંગ્રેસ પ્રમુખ શશીનભાઈ પટેલ, મહામંત્રી પૂરવ તળાવિયા, ખેરગામના મહિલા સરપંચ ઝરણાબેન પટેલ જેવા બીજા આગેવાનો અને કાર્યકરોની ઉપસ્થિતિ જોવા મળ્યા હતા.
