બારડોલી: ફરી એક વખત બારડોલી તાલુકામાં જીવલેણ અકસ્માતની ઘટના બનવા પામી છે. આજરોજ બારડોલીના ઈસનપોર ગામની સીમમાં વિદ્યાર્થીઓ ભરેલી ઈકો કાર સાઈડ પર ઉતરી ધડાકાભેર ઝાડ સાથે અથડાતાં 2 વિધાર્થીના ગંભીર ઈજાઓને કારણે ઘટનાસ્થળે જ મોત થયાં હતાં, જ્યારે સારવાર દરમિયાન વધુ એક વિદ્યાર્થીનું મોત નીપજ્યું હતુ, આમ કાર અકસ્માતમાં કુલ 3 વિદ્યાર્થીઓના કરુણ મોત નીપજ્યા છે. તો અન્ય 5 વિદ્યાર્થીઓને ગંભીર ઈજાઓ પહોંચતા તેમને સારવાર અર્થે ખસેડવામાં આવ્યા છે.
છેલ્લા કેટલાક દિવસોથી બારડોલી તાલુકામાં સતત અકસ્માતના બનાવો વધી રહ્યા છે. ત્યારે વધુ આ અકસ્માતમાં બારડોલી તાલુકાના ઈસનપોર ગામની સીમમાં વિદ્યાર્થીઓ ભરેલી ઈકો કાર પસાર થઈ રહી હતી. એ દરમિયાન કારના ચાલકે સ્ટીયરિંગ પરનો કાબુ ગુમાવતા કાર રસ્તાની નીચે ઉતરી ગઈ હતી અને ઝાડ સાથે ધડાકાભેર અથડાઈ હતી. આ ઘટનામાં ઈકો કારમાં સવાર 2 વિદ્યાર્થીઓને ગંભીર ઈજાઓ થતાં તેમના ઘટનાસ્થળે જ કમકમાટીભર્યા મોત થયાં એ, જ્યારે અન્ય વિદ્યાર્થીઓમાંથી એક વિદ્યાર્થીઓનું સારવાર દરમિયાન મોત નિપજ્યું હતુ. અન્ય 5 વિદ્યાર્થીને નાની મોટી ઈજાઓ થતાં તાત્કાલિક બારડોલી તાલુકામાં આવેલી સરદાર હોસ્પિટલમાં ખસેડવામાં આવ્યા હતાં.
સ્થાનિક સૂત્રોના જણાવ્યાં મુજબ, ઈકો કારમાં સવાર વિદ્યાર્થીઓ બારડોલી તાલુકામાં આવેલી માલીબા કોલેજમાં અભ્યાસ કરતા હતા. તેઓ માંડવી ઈકો કાર લઈને જઈ રહ્યા હતા એ દરમિયાન તેમને આ અકસ્માત નડ્યો હતો. જેમાં પારસ શાહ (નવાપરા માંડવી) 2. જય અમરચંદ શાહ (કામરેજ) 3. કીર્તનકુમાર ભાવસાર (મહુવા)નું મૃત્યુ થયું છે જયારે 1. તનિસક પારેખ (અડાજણ સુરત) 2. મનસ્વી મેરૂલિયા (કતારગામ સુરત) 3. સુમિત માધવણી (બારડોલી) 4. નિધિ પટેલ (નવસારી) 5. હેત્વી દિલીપ પટેલ (પી.એન.પાર્ક માંડવી) ના વિદ્યાર્થીઓ સારવાર હેઠળ છે. અકસ્માતને પગલે 108 એમ્બ્યુલન્સ તેમજ બારડોલી રૂરલ પોલીસનો કાફલો ઘટનાસ્થળ પર દોડી ગયો હતો.
