ચીખલી: આજરોજ ચીખલી તાલુકા પંચાયતમાં આજરોજ પીવાના પાણીની સમસ્યા અંગેની સમીક્ષા બેઠકમાં સરપંચ સભ્યોની રજુઆતમાં તાત્કાલિક સર્વે કરવા માટે વસ્મોના પ્રતિનિધિઓને તાકીદ કરવામાં આવી હતી. જોકે વાસ્મો દ્વારા નલ સે જલ યોજનાના કરવામાં આવેલા કાર્યોમાં ભ્રષ્ટાચાર બાબતે વ્યાપક ફરિયાદો ઉઠી હતી. પીવાના પાણીની સમસ્યા અંગેની મળેલી બેઠકમાં અધિકારીઓ ભેરવાયા હોવાનું લોકો જણાવી રહ્યા છે.
ચીખલી તાલુકા પંચાયતના પ્રમુખ કલ્પનાબેન ગાંવિતના અધ્યક્ષ સ્થાને ઇન્ચાર્જ પી.ઓ. કમ ટી.ડી.ઓ, અંકિત ગોહિલ ભાજપ પ્રમુખ મયંકભાઇ પટેલ કારોબારી અધ્યક્ષ ધર્મેશભાઈ વીજ કંપનીના ઈજનેર ગૌતમભાઈ નાયક, એ.ટી.વી.ટીના સભ્ય પ્રવીણભાઈ પટેલ, નાયબ ટી.ડી.ઓ, વી.જી.સોલંકી વગેરેની ઉપસ્થિતિમાં યોજાયેલી સમીક્ષા બેઠકમાં નલ સે જલ યોજના અંતર્ગત થયેલા પાણીના કામોમાં વીજ જોડાણ માટે સયુંકત ખેડૂત ખાતેદારોમાં તમામની સંમતિ મેળવવામાં ઉભી થતી સમસ્યા અંગે ચર્ચા કરી ઝડપથી વીજ જોડાણ મળે તે પ્રકારનો વ્યવહારું રસ્તો કાઢવા માટે સૂચન કરાયા હતા. વીજ જોડાણ અંગે કાર્યપાલક ઇજનેર ગૌતમભાઈ નાયકે કોટેશન ભરાતાની સાથે જ અગ્રતા આપી જોડાણ આપી દેવામાં આવશે તેમ જણાવ્યું હતું.
નલ સે જલ યોજનામાં ફડવેલ ગામે શાસકપક્ષના નેતા મહેશભાઈની રજુઆતમાં વનેસર થી સર્વે કરવા માટે વાસ્મોના ઈજનેરોને સુચન અપાઈ હતા. વાંઝણા ગામે તાલુકા સભ્ય નરેન્દ્રભાઇ દ્વારા નલ સે જલ યોજનામાં કરાયેલા બોરવેલમાં પૂરતી લંબાઈમાં પાઈપ ન નાખવાથી ઉભી થતી સમસ્યા અંગે રજુઆત કરાતા વાસ્મોના સ્ટાફ દ્વારા નિરાકરણ માટે મૌખિક બાહેંધરી અપાઈ હતી. જિલ્લા પંચાયત સભ્ય પ્રકાશભાઈ દ્વારા પણ રાનકુવા વિસ્તારમાં નલ સે જલ યોજના ના કામોમાં ભારે વેઠ ઉતારવામાં આવી હોવાની ફરિયાદ કરી હતી.
અધ્યક્ષ સ્થાનેથી કલ્પનાબેન ગાંવિત ઉપસ્થિત સરપંચો અને તાલુકા જિલ્લા સભ્યોને પોતાના વિસ્તારમાં પાણીની સમસ્યા હોય તો તેની તાત્કાલિક રજુઆત કરવા જણાવી તેમાં ઝડપી સર્વે કરી નિરાકરણ માટે વાસ્મોના પ્રતિનિધિઓની સૂચના આપી હતી. આ ઉપરાંત વિધવા પેન્શન, વૃધ્ધ પેન્શન, આયુષ્યમાન ભારત કાર્ડ સહિતની વ્યક્તિગત લાભની યોજનાથી કોઈ વંચિત ન રહી જાય તે માટે તકેદારી રાખવા અનુરોધ કર્યો હતો. બેઠકમાં તાલુકાના ગમોના સરપંચો આગેવાનો મોટી સંખ્યામાં ઉપસ્થિત રહ્યા હતા.
