રાજપીપળા: બિરસા મુંડા યુનિવર્સિટીમાં ગત તારીખ ૧૦/૧૨/૨૦૨૧ ના રોજ બનાવતી ડિગ્રી સર્ટિ વેરિફિકશન માટે આવતા તેમજ યુનિવર્સિટીની ફેક વેબ સાઇટ બનાવેલ હોવાથી આ બાબતે યુનિવર્સિટીના રજિસ્ટ્રાર દ્વાર પોલીસ સ્ટેશનમાં નોંધાવેલી એક ફરિયાદના આધારે નર્મદા LCB પોલીસે દિલ્હીથી એક મહિલાને પકડીને દેશવ્યાપી બોગસ ડીગ્રી-માર્કશીટ કૌભાંડ ઝડપી પાડ્યું છે. પોલીસે મૂળ છત્તીસગઢની અને દિલ્હીમાં રહેતી મહિલાની ધરપકડ કરીને તેની પાસેથી દેશની 35 યુનિવર્સિટીની બનાવટી 237 ડીગ્રી અને 510 માર્કશીટ જપ્ત કરી છે. આરોપી મહિલા બેઉલા નંદ રેવ બીસી નંદ ડિપ્લોમા કમ્પ્યુટર એન્જિનિયર છે. તે ગુગલમાં પણ નોકરી કરી ચૂકી છે પોલીસે મહિલાના 6 દિવસના રિમાન્ડ મેળવીને વધુ તપાસ શરૂ કરી છે.
10 ડિસેમ્બર-2021ના રોજ ફરિયાદ થઇ હતી રાજપીપળાની બિરસામુંડા ટ્રાયબલ યુનિવર્સિટીમાં 10 ડિસેમ્બર-21ના રોજ એક બનાવટી વેબસાઈટ બની હતી. આ ઉપરાંત એક બનાવટી ડીગ્રી સર્ટિ. વેરીફીકેશન માટે આવી હતી. આ અંગે રજિસ્ટ્રારે રાજપીપળા પોલીસ સ્ટેશનમાં ફરિયાદ નોંધાવી હતી. જેના આધારે રાજપીપળા પોલીસ અને નર્મદા LCB સહિતની ટીમોએ તપાસ શરૂ કરી હતી.
આ દરમિયાન પોલીસને બાતમી મળી હતી કે, બનાવટી ડિગ્રી સર્ટિફિકેટ દિલ્હી ખાતેથી બેઉલાનંદ રેવ બીસી નંદ નામની મહિલાએ બનાવ્યા છે અને આ મહિલા નવી દિલ્હીના રાજાપુરી રોડ ઉત્તમનગરની રહેવાસી હોવાનું જાણવા મળ્યું હતું. LCBની ટીમ દિલ્હી પહોંચી ગઇ હતી અને આરોપી મહિલાને ઝડપી પાડી હતી અને ઘરમાં તપાસ કરતા દેશની અલગ-અલગ 35 યુનિવર્સિટીના 30 ડિગ્રી સર્ટિફિકેટ અને 10 માર્કશીટ, સ્ટેશનરી, કલર પ્રિન્ટર મશીન તેમજ અલગ-અલગ યુનિવર્સિટી તેમજ બોર્ડના 94 રબર સ્ટેપ તથા ડિગ્રી સર્ટિફિકેટ તથા માર્કશીટ ઉપર લગાડવાના હોલમાર્ક મળી આવ્યા હતા.
આ ઉપરાંત અલગ-અલગ એજ્યુકેશન યુનિવર્સિટી તથા સંસ્થાઓના કુલ-73 વેબસાઇટ ડોમેઇન મહિલા ચલાવતી હોવાનું બહાર આવ્યું હતું. પોલીસે તમામ મુદ્દામાલ કબજે કરીને આરોપી મહિલા સાથે સંપર્ક રહેલા ગુજરાત અને ગુજરાત બહારના 31 એજન્ટની શોધખોળ શરૂ કરી છે. DySP વાણી દૂધાતના સુપરવિઝનમાં 4 ટીમો બનાવી છે. દેશભરમાં તપાસ શરૂ કરવામાં આવી છે. આ કૌભાંડમાં મોટા માથાઓની સંડોવણી બહાર આવે તેવી શક્યતા છે.
આ બાબતે નર્મદા જિલ્લા પોલીસ વડા હિમકર સિંહે પ્રેસ કોન્ફરન્સ કરીને જણાવ્યું હતું કે, બોગસ ડિગ્રી સર્ટિફિકેટ અને માર્કશીટ્સ સાથે પકડાયેલી મૂળ છત્તીસગઢની અને દિલ્હીમાં રહેતી મહિલાની ધરપકડ કરીને તેના 6 દિવસના રિમાન્ડ મેળવ્યા છે અને આ કેસમાં વધુ તપાસ શરૂ કરી છે. ફેક ડિગ્રી કૌભાંડમાં ઝડપાયેલી મહિલા આરોપી બેઉલા નંદ રેવ બીસી નંદ ડિપ્લોમા કમ્પ્યુટર એન્જિનિયર છે અને ગુગલમાં પણ નોકરી કરી ચૂકી છે.
BY ચિરાગ તડવી
