ઝઘડિયા: ગઈકાલે ઝઘડિયા તાલુકાના વાઘપુરા ગામે આવેલ ઓલશીલ સિલિકા વોશિંગ પ્લાન્ટમાં ગંભીર અકસ્માત સર્જાતાં ૫ વર્ષની નિર્દોષ બાળકીનું મૃત્યુ થયું છે. આ ઘટનામાં અન્ય બે બાળકો અને એક મહિલા ગંભીર રીતે ઘાયલ થયા છે.
સ્થાનિકો અને પ્રભાવિતોના આરોપ મુજબ, પ્લાન્ટ સંચાલકોની બેદરકારી અને ગુજરાત પ્રદૂષણ નિયંત્રણ બોર્ડ (GPCB)ના અધિકારીઓની નિષ્ક્રિયતાને કારણે આ કરુણ ઘટના બની છે. પ્લાન્ટમાં પર્યાવરણ અને સલામતીના નિયમોનું ખુલ્લેઆમ ઉલ્લંઘન થતું હોવાનું જણાય છે. GPCB તરફથી અગાઉ શો-કોઝ નોટિસ પણ જારી કરવામાં આવી હતી, જેની અવગણના કરીને પ્લાન્ટને ચાલુ રાખવામાં આવ્યો હતો. જાણકારી હોવા છતાં જોખમ લઈને પ્લાન્ટ સંચાલન કરવાના કારણે આ અકસ્માત થયો હોવાનો આરોપ છે. આ ઘટનાના વિરોધમાં સ્થાનિક લોકો અને પ્રભાવિતોએ ઝઘડિયા પ્રાંત અધિકારીને આવેદનપત્ર આપ્યું છે.
આવેદનમાં મુખ્ય માગણીઓ નીચે મુજબ છે:
• પ્લાન્ટ સંચાલકો અને સંબંધિત વિભાગના અધિકારીઓ સામે માનવવધની ફરિયાદ નોંધવામાં આવે.
• તાત્કાલિક અસરથી સિલિકા વોશિંગ પ્લાન્ટ પર સીલ મારીને તેને બંધ કરવામાં આવે.
• ઘાયલોને યોગ્ય વળતર અને સારવારની વ્યવસ્થા કરવામાં આવે.
સ્થાનિકોમાં આ ઘટનાએ ભારે રોષ જગાવ્યો છે અને પ્લાન્ટની આસપાસના વિસ્તારોમાં પર્યાવરણીય અને આરોગ્ય જોખમો વધી રહ્યા હોવાની ફરિયાદો વારંવાર થતી રહી છે. પ્રાંત અધિકારીએ આવેદનપત્ર સ્વીકારીને તપાસના આશ્વાસન આપ્યા છે. આ મામલે GPCB અને અન્ય સંબંધિત વિભાગો તરફથી સત્તાવાર પ્રતિસાદની રાહ જોવાઈ રહી છે.
