વાંસદા: આજરોજ વાંસદા તાલુકાના ભાજપના યુવા લીડર કમલભાઈ સોલંકીની નવસારી જિલ્લા ભાજપ યુવા મોરચાના ઉપપ્રમુખ તરીકે નિયુક્ત કરવામાં આવ્યા છે જેને લઈને તાલુકામાં રાજકીય તેમજ સામાજિક વર્તુળોમાં ખુશીની લાગણી ફેલાઈ ગઈ છે.
વાંસદાના પત્રકારો દ્વારા કમલભાઈ સોલંકીનું ઉષ્માભર્યું સન્માન સ્વરૂપે તેમને હાર પહેરાવી તેમજ ફૂલોનો આકર્ષક ગુલદસ્તો અર્પણ કરી શુભેચ્છાઓ પાઠવી હતી. પત્રકારોએ જણાવ્યું હતું કે કમલભાઈ સોલંકી લાંબા સમયથી સમાજસેવામાં સક્રિય રહ્યા છે અને યુવાનોમાં તેમની લોકપ્રિયતા નોંધપાત્ર છે. તેમની નિષ્ઠા, કાર્યશૈલી અને સંગઠનક્ષમતા કારણે તેમને આ મહત્વપૂર્ણ જવાબદારી સોંપવામાં આવી છે. કમલભાઈ પોતાના નવા હોદ્દા પર રહી યુવા મોરચાને વધુ મજબૂત બનાવશે તેમજ સમાજના વિકાસ માટે નવી દિશામાં કામ કરશે. ખાસ કરીને યુવાનોને પ્રેરણા આપી તેમને રાષ્ટ્ર નિર્માણમાં જોડવા માટે તેઓ મહત્વપૂર્ણ ભૂમિકા ભજવશે તેવી અપેક્ષા વ્યક્ત કરવામાં આવી હતી.
સન્માન સ્વીકારતા કમલભાઈ સોલંકીએ તમામ પત્રકાર મિત્રોનો દિલથી આભાર વ્યક્ત કરતાં જણાવ્યું કે પાર્ટીએ આપેલી જવાબદારીને તેઓ સંપૂર્ણ નિષ્ઠા અને સમર્પણ સાથે નિભાવશે. સાથે સાથે તેઓ યુવાનોના પ્રશ્નોને પ્રાથમિકતા આપીને તેમના ઉકેલ માટે સક્રિય પ્રયાસ કરશે અને સમાજના સર્વાંગી વિકાસ માટે સતત કાર્યરત રહેશે. કાર્યક્રમ દરમિયાન હાજર રહેલા પત્રકારો અને સ્થાનિક આગેવાનો વચ્ચે પણ આનંદનો માહોલ જોવા મળ્યો હતો.
