ચીખલી: નવસારી જિલ્લાના ચિખલી તાલુકાના માંડવખડક પ્રાથમિક આરોગ્ય કેન્દ્ર (PHC)માં આવતા ૯૯.૯૯ ટકા દર્દીઓ આદિવાસી હોવા છતાં અહીં ફરજ બજાવતા બંને ડોક્ટરો બિન-આદિવાસી છે. ભાષા-સંસ્કૃતિના તફાવતને કારણે દર્દીઓ પોતાની વ્યથા યોગ્ય રીતે સમજાવી શકતા નથી અને ડોક્ટરો પણ દર્દીઓની વેદના સમજી શકતા નથી, એવો આક્ષેપ સ્થાનિક આદિવાસી સમાજ દ્વારા ઉઠી રહ્યો છે.
દર્દીના સગાનું કહેવું છે કે આજે, મારા પપ્પાને બ્લડ પ્રેશર ઓછું હતું, ચક્કર આવતા હતા, કે શરીરમાં પાણીની ઊણપ (ડિહાઇડ્રેશન) હોય તેવો કેસમાં પણ ડોક્ટરો ગ્લુકોઝની બોટલ ચડાવવાની બદલે માત્ર ORSના બે પાવડર પેકેટ આપીને દર્દીને ઘેર મોકલાવી દીધા. “દર્દી માત્ર દર્દી નથી, એ માણસ છે. તેને સાજો કરવો એ ડોક્ટરની ફરજ છે અને એના માટે જ તેમને પગાર-ભથ્થું મળે છે,” એમ રોષભેર વાત કરી હતી. તેમણે કહ્યું કે આ મુદ્દે તે ગામના પ્રથમ નાગરિક સરપંચ વલ્લભભાઈ ચૌધરીને વાત કરશે.
આ મામલે જ્યારે સ્થાનિક આદિવાસી આગેવાનો સાથે Decision News એ વાત કરી તો તેમણે સવાલ ઉઠાવ્યો છે કે, “આદિવાસી વિસ્તારની આરોગ્ય સેવા માટે નવસારી આરોગ્ય વિભાગને એક પણ આદિવાસી ડોક્ટર કેમ ન મળ્યો ? શું આદિવાસી સમાજના લોકોનું સ્વાસ્થ્ય મહત્વનું નથી ?”
બાબતે જિલ્લા આરોગ્ય વિભાગ સાથે જોડાયેલા એક અધિકારીનો સંપર્ક કર્યો તો તેમણે જણાવ્યું હતું કે, “ડોક્ટરોની નિમણૂક રાજ્ય કક્ષાએથી થાય છે. આદિવાસી વિસ્તારોમાં આદિવાસી ડોક્ટરોની પ્રાથમિકતા આપવાનો પ્રયાસ કરવામાં આવે છે,પણ હાલમાં ઉપલબ્ધતા નથી. માડવખડક PHCની ફરિયાદોની તપાસ કરાવીશું.” આદિવાસી સમાજે ચીમકી આપી છે કે, જો ટૂંક સમયમાં આદિવાસી ડોક્ટરની નિમણૂક ન થાય અને સારવારમાં સુધારો ન આવે તો આંદોલન કરવામાં આવશે.
