સુરત: દક્ષિણ ગુજરાત વીજ કંપની લિ. દ્વારા વર્ષોથી પડતર રાખેલી ભરતી નહીં કરવા અને પરીક્ષા પાસ કરનાર યુવાનોને નોકરી ન આપી આઉટસોર્સિંગથી બિન-અનુભવી અને બિન-પ્રમાણિત કામદારોને નોકરી આપવાના વિરોધમાં આજે કાપોદ્રા સ્થિત DGVCLની મુખ્ય કચેરી ખાતે મોટી સંખ્યામાં યુવાનોએ આક્રોશ સભા યોજી હતી. આ સભાને ધારાસભ્ય અનંતભાઈ પટેલ અને ધારાસભ્ય ચૈતર વસાવા હાજર રહ્યા હતા. બંને આદિવાસી ધારાસભ્યોએ DGVCLની નીતિને “યુવાનોના ભવિષ્ય સાથે ચેડાં” ગણાવી તીવ્ર શબ્દોમાં વિરોધ નોંધાવ્યો.
અનંત પટેલે જણાવ્યું કે, “DGVCL દ્વારા જે યુવાનોએ પરીક્ષા પાસ કરી નોકરીની યોગ્યતા પ્રાપ્ત કરી છે એવા યુવાનોને નોકરીના નિમણૂક પત્ર ન આપી કંપની આઉટસોર્સિંગ કંપનીઓ દ્વારા એવા લોકોને કામે રાખે છે જેમણે ન તો ITI કર્યું છે, ન એપ્રેન્ટિસશિપ કરી છે, ન પરીક્ષા આપી છે. જેનો વિરોધ યુવાઓ કરી રહ્યા છે.” જેને અમે સમર્થન આપીએ છીએ અમે આ લડતમાં વિરોધ કરી રહેલા યુવાઓ સાથે છીએ. તેમણે ન્યાય મળવો જ જોઈએ.
ચૈતર વસાવાએ કહ્યું, સરકાર એક તરફ ‘સ્વરોજગાર’ની વાત કરે છે અને બીજી તરફ સરકારી કંપનીઓમાં નિયમિત ભરતી બંધ કરી દે છે. આ યુવાનોની છેતરપિંડી છે. અમે આ મુદ્દો વિધાનસભામાં પણ ઉઠાવીશું.” સભામાં હાજર યુવાનોએ જણાવ્યું કે DGVCLએ અમે પરીક્ષા પાસ કરીને નોકરી માટે દાવેદાર બન્યા હોવા છતાં અમને નોકરી આપતા નથી અને આઉટસોર્સિંગ દ્વારા હજારો કામદારો નોકરીઓ આપવામાં આવી રહી છે, આનાથી અમારું મનોબળ તૂટી રહ્યું છે
