તેલંગાના હાઈકોર્ટે આદિવાસી કલ્યાણ સંબંધિત યોજનાઓનો અમલ ન થતા રાજ્ય સરકારને નોટિસ ફટકારી છે. આમાંની કેટલીક યોજનાઓના ઠરાવો 2013માં પસાર કરવામાં આવ્યા હતા. ચીફ જસ્ટિસ હિમા કોહલી અને જસ્ટિસ બી વિજયસેન રેડ્ડીની બનેલી તેલંગાણા હાઈકોર્ટની બેન્ચે આદિવાસી સંક્ષેમા પરિષદ દ્વારા દાખલ કરવામાં આવેલી જાહેર હિતની અરજી (પીઆઈએલ)માં રાજ્ય અને કેન્દ્ર સરકારોને નોટિસ ફટકારી છે.
PILમાં તેલંગાના જંગલોમાં રહેતા આદિવાસીઓ માટે વીજળી, એમ્બ્યુલન્સ અને અન્ય તબીબી સહાય જેવી પ્રાથમિક સુવિધાઓ માંગી છે. પીઆઈએલમાં આરોપ છે કે વન વિભાગના અધિકારીઓ અને પોલીસ કર્મચારીઓ આ સવલતોને સુનિશ્ચિત કરવાને બદલે આદિવાસીઓને તેમની જમીન પરથી બળજબરીથી બહાર કાઢી રહ્યા છે.
અરજદારના વકીલ પી.વી.રમણાની ખંડપીઠને માહિતી આપી હતી કે આદિવાસી સલાહકાર પરિષદે 2013 થી જંગલમાં રહેતા આદિવાસી વસ્તી માટે વીજળી અને એમ્બ્યુલન્સ સેવાઓની માંગણી કરતા અનેક ઠરાવો પસાર કર્યા છે, પરંતુ તેલંગાના સરકાર દ્વારા આમાંથી કોઈ પણ ભલામણો લાગુ કરવામાં આવી નથી.
અરજદારે કોર્ટને જણાવ્યું હતું કે વન અધિકાર અધિનિયમ હેઠળ જમીન લીઝ મેળવવા માંગતા આદિવાસીઓની ઓછામાં ઓછી 19,000 અરજીઓ મહેસૂલ અધિકારીઓ પાસે પેન્ડિંગ છે, જેના પર કોઈ કાર્યવાહી કરવામાં આવી નથી.
અરજદારની સુનાવણી બાદ મુખ્ય ન્યાયાધીશ હિમા કોહલીએ વિશેષ સરકારી વકીલ હરેન્દ્ર પ્રસાદ પાસેથી એ જાણવા માંગ્યું કે સરકાર આદિવાસી વિસ્તારોમાં મૂળભૂત સુવિધાઓ આપવા માટે ભંડોળ કેમ બહાર પાડતી નથી. વકીલે કહ્યું કે તેને સૂચનાઓ આપવામાં આવશે.
મુખ્ય ન્યાયાધીશ કોહલીએ આદિજાતિ કલ્યાણ મંત્રાલયના સચિવને સોગંદનામું દાખલ કરવાનો નિર્દેશ પણ આપ્યો છે. આ સોગંદનામામાં, આદિવાસી સલાહકાર પરિષદના અધ્યક્ષ અને આદિવાસી કલ્યાણ મંત્રી, હૈદરાબાદને 2013 થી પ્રાપ્ત દરખાસ્તોના અમલીકરણ માટે લેવામાં આવેલા પગલાઓની માહિતી આપવા માટે કહેવામાં આવ્યું છે. આ સિવાય જો કોઈ પગલા લેવામાં આવ્યા નથી, તો તેની પાછળના કારણો પૂછવામાં આવ્યા છે. સરકાર પાસે આ સોગંદનામું દાખલ કરવા માટે ચાર સપ્તાહ છે.
