માંડવી: માંડવી તાલુકાના લાખગામ ખાતે વિશ્વ આદિવાસી દિવસની ઉજવણી ખૂબ જ ઉત્સાહપૂર્વક કરવામાં આવી હતી. આ કાર્યક્રમનું વિશેષ આયોજન ગામના સરપંચ દીનાબેન ચૌધરીના નેતૃત્વ હેઠળ સ્થાનિક મહિલા જૂથ સાથે મળીને કરવામાં આવ્યું હતું. કાર્યક્રમ દરમિયાન ઉપસ્થિત ગ્રામજનોને આદિવાસી સમાજની આગવી અસ્મિતા, સંસ્કૃતિ અને પરંપરાઓથી માહિતગાર કરવામાં આવ્યા હતા.
Decision News ને મળેલી જાણકારી મુજબ આ કાર્યક્રમમાં મહિલા સશક્તિકરણ પર વિશેષ ભાર મૂકતા સરપંચ દીનાબેન ચૌધરીએ જણાવ્યું હતું કે, “આદિવાસી સમાજના સર્વાંગી વિકાસ માટે મહિલાઓની સક્રિય ભાગીદારી અત્યંત જરૂરી છે.” તેમણે મહિલાઓને શિક્ષણ, સ્વરોજગાર, સામાજિક જાગૃતિ અને ગ્રામ વિકાસ જેવા ક્ષેત્રોમાં આગળ આવવા માટે આહ્વાન કર્યું હતું. સાથે જ, મહિલા જૂથોને પ્રોત્સાહિત કરીને તેઓ પોતાના હક્કો અને જવાબદારીઓ પ્રત્યે જાગૃત થઈ આત્મનિર્ભર બને તે દિશામાં માર્ગદર્શન પૂરું પાડ્યું હતું.
આ ઉજવણી પ્રસંગે તાલુકા પંચાયત પ્રમુખ શારદાબેન કમલેશભાઈ વસાવાએ ખાસ ઉપસ્થિત રહીને મહિલાઓ અને ગ્રામજનોનો ઉત્સાહ વધાર્યો હતો. આ સિવાય શિક્ષક ઉર્મિલાબેન, રામસિંગભાઈ, અનિલભાઈ ચૌધરી સહિતના સ્થાનિક આગેવાનો અને મોટી સંખ્યામાં ગ્રામજનો હાજર રહ્યા હતા. વિશ્વ આદિવાસી દિવસની આ ઉજવણી માત્ર એક ઉત્સવ પૂરતી સીમિત ન રહેતા, સમાજમાં આદિવાસી અસ્મિતા, શિક્ષણ, અધિકારો અને મહિલા સશક્તિકરણ અંગેનો એક સકારાત્મક અને પ્રેરણાદાયી સંદેશ પહોંચાડવામાં સફળ રહી હતી.
