દક્ષિણ ગુજરાત: ગતરોજ દક્ષિણ ગુજરાતની સુગર ફેક્ટરીઓએ આ વર્ષે શેરડીના ભાવ જાહેર કરી દીધા છે, પરંતુ આ જાહેરાત ખેડૂતો માટે ખુશખબર કરતાં વધુ નિરાશાજનક સાબિત થઈ છે. ખેડૂતો ટન દીઠ 4000 સુધીના ભાવની આશા રાખી રહ્યા હતા, ત્યારે મિલોએ 3500થી 3800 વચ્ચેના ભાવ જાહેર કર્યા છે.
ગયા વર્ષની સરખામણીએ થોડો વધારો થયો હોવા છતાં, વધતા ખેતી ખર્ચ સામે આ વધારો નગણ્ય ગણાઈ રહ્યો છે. ખાતર, મજૂરી, ડીઝલ અને દવાઓના ભાવમાં સતત ઉછાળો આવ્યો છે. આ વધતા ખર્ચને કારણે ખેડૂતોની આવક પર સીધી અસર પડી રહી છે અને ખેતી નફાકારક રહે તેવી સ્થિતિ નથી.
ખેડૂતોનું કહેવું છે કે ખાંડ અને ઇથેનોલના બજાર ભાવમાં જે વધારો થયો છે તેનો યોગ્ય લાભ તેમના સુધી પહોંચ્યો નથી. સુગર મિલો અને બજાર વચ્ચેનો નફો વધી રહ્યો છે, પરંતુ ખેડૂત હજુ પણ સંઘર્ષમાં જ છે. “ભાવ વધ્યા છે… પણ ખેડૂતનો ફાયદો ક્યાં?” — આ સવાલ આજે દરેક શેરડી ઉગાડતા ખેડૂતના મનમાં ઉઠી રહ્યો છે. ઘણા ખેડૂતોમાં અસંતોષની લાગણી સ્પષ્ટ દેખાઈ રહી છે. કેટલાક વિસ્તારોમાં વિરોધ પ્રદર્શન અને મિલ સામે આંદોલનની તૈયારીઓ પણ શરૂ થઈ ગઈ છે.
ખેડૂતોના આગેવાનો કહે છે કે જો મિલો અને સરકાર તરફથી યોગ્ય ભાવ અને સમર્થન નહીં મળે તો વ્યાપક આંદોલન થઈ શકે છે. આ સમગ્ર મામલે સુગર મિલોના પ્રતિનિધિઓ હજુ સુધી કોઈ સત્તાવાર પ્રતિક્રિયા આપી નથી. ખેડૂતો હવે સરકાર પાસે હસ્તક્ષેપની માંગ કરી રહ્યા છે જેથી તેમની આવકમાં વાસ્તવિક વધારો થાય.
