નાનાપોંઢા: વલસાડ જિલ્લાના નાનાપોંઢા તાલુકાના અરનાલા ગામમાં આજે એક અનોખી અને સંવેદનશીલ પહેલની શરૂઆત કરવામાં આવી. ગામમાં નાના પ્રાણીઓ (જેમ કે કૂતરા, બિલાડીઓ વગેરે) માટે સમર્પિત સ્મશાન (પેટ ક્રેમેટોરિયમ અથવા અંતિમ સંસ્કાર સ્થળ) ની શરૂઆત કરાઈ છે. આ પહેલનો મુખ્ય ઉદ્દેશ્ય મૃત્યુ પામેલા નાના પ્રાણીઓના સન્માનપૂર્વક અને વૈજ્ઞાનિક રીતે અંતિમ સંસ્કાર કરવાનો છે, જેથી પર્યાવરણને પણ નુકસાન ન થાય અને પ્રાણીઓ પ્રત્યેની કરુણા દર્શાવી શકાય.
આ કાર્યક્રમ અરનાલા ગામની સાર્વજનિક સ્મશાન ભૂમિ ખાતે યોજાયો હતો, જ્યાં ગામના અનેક ગ્રામજનો મોટી સંખ્યામાં ઉપસ્થિત રહ્યા હતા. કાર્યક્રમમાં વિશેષ અતિથિ તરીકે પારડી તાલુકાના પ્રાંત અધિકારી શ્રી નીરવ પટેલ, અરનાલા ગામના સરપંચ, પાટી ગામના સરપંચ, ગોઈમા ગામના ગ્રામજનો, અરનાલા ગામના તલાટી કમ મંત્રી, સ્પર્શ સંસ્થાના ટ્રસ્ટી મહર્ષિ કે. દવે અને ઋતુ એમ. દવે, તેમજ એડવોકેટ ભૂમિકાબેન ઉપસ્થિત રહ્યા હતા અને કાર્યક્રમને શોભા વધારી હતી.
હાજર મહાનુભાવોએ આ પહેલને અત્યંત સરાહનીય ગણાવી હતી. તેમણે ભાવનાપૂર્વક જણાવ્યું કે પ્રાણીઓ પણ પરિવારના સભ્યોની જેમ જ છે અને તેમના મૃત્યુ પછી પણ સન્માન આપવું એ માનવતાનું લક્ષણ છે. આ સાથે પર્યાવરણ પ્રત્યે જવાબદારી નિભાવવા અને પ્રાણીઓ પ્રત્યે કરુણા રાખવાનો સંદેશ પણ આપવામાં આવ્યો હતો. આ પહેલ ગુજરાતમાં પ્રાણી કલ્યાણ અને પર્યાવરણ સંરક્ષણની દિશામાં એક મહત્વપૂર્ણ પગલું ગણાય છે. અરનાલા ગામના લોકો અને સ્પર્શ સંસ્થાના પ્રયાસોથી આ સ્મશાન આગામી સમયમાં આસપાસના ગામો માટે પણ ઉપયોગી બનશે તેવી અપેક્ષા છે. આવી સંવેદનશીલ પહેલો સમાજમાં પ્રાણીઓ પ્રત્યેની જવાબદારી અને સહાનુભૂતિ વધારવામાં મદદરૂપ થશે.
