વલસાડ: વલસાડ જિલ્લાના શિક્ષણક્ષેત્રમાં નવી ઊર્જા સંચાર કરવા અને ગુણવત્તાસભર શિક્ષણ વ્યવસ્થાને વધુ મજબૂત બનાવવાના ઉદ્દેશ સાથે ઉચ્ચત્તર માધ્યમિક શાળા શિક્ષણ સહાયક ભરતી વર્ષ 2024 અંતર્ગત પસંદ થયેલા ઉમેદવારોને નિમણૂંકના હુકમ અને ભલામણ પત્રો વિતરણ કાર્યક્રમ બી.એ.પી.એસ. સ્વામિનારાયણ વિદ્યામંદિર, અબ્રામા, વલસાડ ખાતે યોજાયો હતો.આ પ્રસંગે કપરાડાના ધારાસભ્યશ્રી અને પૂર્વ મંત્રીશ્રી જીતુભાઈ ચૌધરી તેમજ ધરમપુરના ધારાસભ્યશ્રી અરવિંદભાઈ પટેલ મુખ્ય અતિથિ તરીકે ઉપસ્થિત રહ્યા હતા. બંને આગેવાનોએ નવો જવાબદારી સંભાળનાર શિક્ષણ સહાયકોને શુભકામનાઓ પાઠવીને પોતાના સંબોધનમાં જણાવ્યું કે શિક્ષકનું સ્થાન સમાજમાં ખૂબ મહત્ત્વનું છે. વિદ્યાર્થીઓના જીવન ઘડવામાં અને ગામ, તાલુકા, જિલ્લામાં શિક્ષણની ગુણવત્તા વધારવામાં શિક્ષકોની ભૂમિકા મુખ્ય છે.
જીતુભાઈ ચૌધરીએ પોતાના સંબોધનમાં જણાવ્યું કે રાજ્ય સરકાર શિક્ષણની ગુણવત્તા સુધારવા સતત પ્રયત્નશીલ છે. વિદ્યાર્થીઓને આધુનિક શિક્ષણ પ્રણાલીઓથી લેબલ કરવા માટે જિલ્લા અને રાજ્ય સ્તરે સતત શિક્ષણ આધારભૂત કામગીરી ચાલી રહી છે. વિદ્યા, સંસ્કાર અને ભાષાની ગૌરવમય પરંપરાને ટકાવી રાખવામાં શિક્ષકોનું યોગદાન અમૂલ્ય છે.ધરમપુર ધારાસભ્યશ્રી અરવિંદભાઈ પટેલે કહ્યું કે શિક્ષણ ક્ષેત્રે થયેલી આ ભરતી સાથે ઘણી ખાલી જગ્યાઓ ભરાઈ જવાથી વિધાર્થીઓના ભવિષ્યમાં સુધારો થશે. શિક્ષણ સહાયકોને આ તકનો પૂરો ઉપયોગ કરીને સંપૂર્ણ ઈમાનદારી, નિષ્ઠા અને સેવાભાવથી વિદ્યાર્થીઓના ભવિષ્ય ઘડવાની ફરજનું પાલન કરવાની અપીલ પણ કરી.
કાર્યક્રમમાં જિલ્લા શિક્ષણાધિકારી શ્રી, તાત્કાલિક શિક્ષણ નિરીક્ષકશ્રીઓ, સ્કૂલના ટ્રસ્ટી મંડળના પ્રતિનિધિઓ, નવ નિમણૂક પામેલા શિક્ષણ સહાયકો તથા તેમના પરિવારજનો મોટી સંખ્યામાં ઉપસ્થિત રહ્યા હતા.કાર્યક્રમમાં વિદ્યાર્થીઓ દ્વારા વંદે માતરમ્ અને પ્રાર્થના સાથે શુભારંભ કરવામાં આવ્યો હતો. ત્યારબાદ નિમણૂંક પત્ર વિતરણની પ્રક્રિયા ખૂબ જ વ્યવસ્થિત રીતે હાથ ધરવામાં આવી હતી. વિદ્યાર્થીઓના પેરેન્ટસ તેમજ નવું સ્થાન મેળવેલ શિક્ષણ સહાયકોના ચહેરા પર ખુશી અને ઉત્સાહ જોવા મળ્યો.
આ નિમણૂંક વિતરણ સાથે જ જિલ્લામાં શિક્ષણની કામગીરી વધુ ગતિ પકડશે અને વિદ્યાર્થીઓને સમયસર માર્ગદર્શન અને પાઠ્યક્રમ પૂર્ણ કરવામાં સહાય મળશે. કાર્યક્રમ અંતે આભાર વિધિ કરવામાં આવી હતી જેમાં જિલ્લા શિક્ષણાધિકારી કચેરી દ્વારા આયોજનમાં સહકાર આપનાર તમામ અધિકારીઓ, કર્મચારીઓ, સ્કૂલ મેનેજમેન્ટ તથા ઉપસ્થિત મહેમાનોનો આભાર માનવામાં આવ્યો હતો.આ કાર્યક્રમ સાથે જ રાજ્ય સરકારની શિક્ષણ ક્ષેત્રે નવી નિમણૂકો દ્વારા શિક્ષણક્ષેત્રને મજબૂત બનાવવાની પ્રતિબદ્ધતા ફરી સાબિત થઈ છે, અને વલસાડ જિલ્લાના શાળાઓમાં શૈક્ષણિક ગુણવત્તા અને કાર્યક્ષમતા વધશે એવી આશા વ્યક્ત કરવામાં આવી છે.
