દેવગઢ બારીયા: અમદાવાદ-ઇન્દોર હાઇવે પર ડ્રાઇવરે ટ્રક ન રોકતા RTO ઇન્સ્પેક્ટર વી. કે. પરમારે ટ્રક આગળ બેરિકેટ ફેકીને ટ્રક રોકાવી અને બાદમાં ડ્રાઇવરને ઢોરમાર માર્યો હોવાની ઘટના સામે આવતા લોકોમાં આક્રોશ જોવા મળી રહ્યો છે.
મળતી માહિતી મુજબ મુંબઇથી દિલ્હી જઈ રહેલી એક ટ્રકને RTO અધિકારીઓએ રૂવાબારી નજીક રોકવાનો પ્રયાસ કર્યો હતો, પરંતુ ટ્રક ચાલકે ટ્રક ન રોકતાં RTO ઇન્સ્પેક્ટર વી. કે. પરમારે અચાનક ટ્રકની આગળ બેરીકેટીંગ ફેકતા બેરીકેટીંગ સાથે ટ્રક અથડાતા ટ્રકનું આગળનું ટાયર પંચર થઈ ગયું હતું. આ બાદ RTO ઇન્સ્પેક્ટર વી. કે. પરમાર અને તેમની સાથેના અન્ય બે સ્ટાફના કર્મચારીઓએ ટ્રક ડ્રાઇવર નાસીરભાઈને ટ્રકની કેબિનમાંથી નીચે ઉતારીને લાકડાના હાથાથી ગંભીર રીતે ઢોર માર માર્યો હતો. ડ્રાઇવરે વારંવાર પૂછવા છતાં કે તેને કેમ મારવામાં આવે છે, RTO અધિકારી અને તેમના સાથીઓએ મારપીટ ચાલુ રાખી હતી.
આ ઘટનાનો વીડિયો હાઇવે પરથી પસાર થતા એક રાહદારીએ દૂરથી ઉતાર્યો હતો. વીડિયો ઉતારવાની જાણ થતાં જ વી. કે. પરમારે મારપીટ બંધ કરી અને લાકડું બાજુમાં ફેંકી દીધું હતું. જ્યારે વીડિયો ઉતારનાર વ્યક્તિએ પૂછૈય કે, “તમે તેને કેમ મારો છો?” તો તેમણે કોઈ જવાબ આપ્યો નહોતો. આ મામલે ડ્રાઇવર અને વીડિયો બનાવનારે RTO ઇન્સ્પેક્ટર પર રોફ જમાવવાનો આરોપ મુક્યો છે. બીજી તરફ આરટીઓ ઇન્સ્પેક્ટરે વાતને નકારતા એવું કહ્યું છે કે, ટ્રક નહોતી રોકી એટલે અમે ખાલી ડ્રાઇવરને ડરાવતા હતા.
