વિશ્વ મધમાખી દિવસ: સમગ્ર વિશ્વમાં 20 મેના દિવસને વિશ્વ મધમાખી દિવસ તરીકે ઉજવવામાં આવે છે. વિશ્વ મધમાખી દિવસનો મુખ્ય ઉદ્દેશ ઇકોસિસ્ટમમાં મધમાખીઓ અને અન્ય પરાગ રજકોના મહત્વને ઓળખવાનો છે. વિશ્વ મધમાખી દિવસ મુખ્યત્વે જૈવવિવિધતા જાળવવામાં, મધમાખીના મહત્વ વિશે જનજાગૃતિ વધારવા માટે પણ ઉપયોગી નીવડે છે. વિશ્વ મધમાખી દિવસમાં મધમાખીના મહત્વ વિશે જનજાગૃતિ વધારવાના કારણે પરાગ રજકો અને તેમના રહેઠાણોનું રક્ષણ થશે અને તેમાં સુધારો થશે, તેમની વસ્તીમાં વધારો થશે અને મધમાખી ઉછેરના લાંબા ગાળાના વિકાસને ટેકો આપશે.
વિશ્વ મધમાખી દિવસ 2022 ની થીમ “મધમાખી સંલગ્ન: મધમાખીઓ અને મધમાખી ઉછેરની વિવિધતાની ઉજવણી” છે. 2017 માં સંયુક્ત રાષ્ટ્રના (યુ.એન) સભ્ય દેશો દ્વારા આજના દિવસને વિશ્વ મધમાખી દિવસ તરીકે ઉજવણી કરવાના પ્રસ્તાવને મંજૂરી આપવામાં આવી હતી. 2018 માં પ્રથમ વખત વિશ્વ મધમાખી દિવસ મનાવવામાં આવ્યો હતો.
માનવ, છોડ, પ્રાણીઓ અને પર્યાવરણ વચ્ચે સંતુલન જાળવવામાં મધમાખી મુખ્ય ભૂમિકા ભજવે છે. મધમાખીઓ વિના ખોરાકની અછત રહેશે અને વસ્તીનો એક વિશાળ ભાગ ભૂખમરાથી નાશ પામી શકે છે. મધમાખી પરાગનયન દ્વારા વિશ્વભરમાં કૃષિ ઉત્પાદનમાં વધારો કરે છે. માનવ પ્રવૃત્તિના પરિણામે મધમાખીઓ દ્વારા સામનો કરવામાં આવતા જોખમો વિશે જાગૃતિ લાવવા અને આપણી જૈવવિવિધતામાં મધમાખીઓના મહત્વને સ્વીકારવા માટે વિશ્વ મધમાખી દિવસની ઉજવણી કરવામાં આવે છે.
