દાહોદ: ડેડીયાપાડાના ધારાસભ્ય ચૈતર વસાવા એક અત્યંત ગંભીર મુદ્દા પર વીડિયોના માધ્યમથી પોતાની વાત રજૂ કરતા જણાવ્યું હતું કે, ગુજરાતના દાહોદ જિલ્લામાં આવેલ સંજેલી તાલુકામાં એક મહિલાને 15 જેટલા ઈસમોએ ઘરમાંથી કાઢીને તેને સાંકળ વડે બાંધીને, ગાડી પાછળ બાંધીને આખા ગામમાં અર્ધનગ્ન હાલતમાં સરઘસ કાઢ્યું હતું.
આ દુઃખદ ઘટનાને અમે સખત શબ્દોમાં વખોડીએ છીએ. એ ગામમાં વડીલો અને મહિલાઓ પણ હશે તો પણ આટલું નિર્લજ્જ કામ કરનાર વ્યક્તિને કોઈએ રોક્યો કેમ નહીં ? ગુજરાતમાં કાયદો અને વ્યવસ્થા ખાળે ગઈ છે. સરકાર મહિલા સલામતીની વાતો કરે છે, પરંતુ રોજે રોજ પેપરમાં જોઈએ છીએ કે ગુજરાતમાં આપણી આદિવાસી માતા બહેન દીકરીઓ સલામત નથી.
Decision News ને મળેલી માહિતી મુજબ આપણા દેશમાં આજની તારીખમાં પણ આવી તાલીબાની સજાઓની આપણી બહેન દીકરીઓ ભોગ બને છે. સરકાર સમક્ષ અમારી માંગ છે કે આ ઘટનામાં જે પણ લોકો સંકળાયેલા હોય એ તમામ જવાબદાર લોકો પર કાયદેસરની કાર્યવાહી કરવામાં આવે અને ફાસ્ટ ટ્રેક કોર્ટમાં કેસ ચલાવવામાં આવે અને આ તમામ લોકોને કડકમાં કડક સજા કરવામાં આવે. જેના કારણે એક દાખલો બેસે અને ભવિષ્યમાં કોઈ આ રીતની ઘટનાને અંજામ આપવાનું વિચારે પણ નહીં.
