આહવા: ગળાકાપ સ્પર્ધાત્મક માહોલ વચ્ચે માધ્યમિક શિક્ષણ પણ માંડ પુરૂ કરી શકેલી, ડાંગ જિલ્લાના સાવરદા જેવા અંતરિયાળ વિસ્તારની યુવતિઓ, મિશન મંગલમ જેવી યોજનાના સહારે આત્મનિર્ભર બની ઘર આંગણે રોજગારી મેળવતી થઈ છે. તેમ સુબિર તાલુકાના સાવરદા ગામના કિંજલ સખી મંડળના રવિના ગાવિતે જણાવ્યું હતું.
ગત વર્ષે જ ગામની દસ જેટલી યુવતિઓએ એકત્ર થઈ સખી મંડળની રચના કરી હતી. તુરત જ તેમણે શિવણકામની તાલીમ સહિત મશરૂમ ઉત્પાદન, અને નાગલી પાપડ બનાવવાની તાલીમથી સજ્જ થઈ, ગામડા ગામમાં શિવણકામ સાથે અન્ય જરૂરિયાતમંદ બહેનોને શિવણની તાલીમ આપવાનું પણ આ શરૂ કરતા, અહીં નવી પ્રવૃત્તિના શ્રીગણેશ થવા પામ્યા છે. બ્લાઉઝ અને ડ્રેસ સિવવા સાથે તેના કાપડનું વેચાણ કરી મહિને દાડે અંતરિયાળ વિસ્તારની આદિવાસી યુવતિઓ, દસ બાર હજાર રૂપિયા આરામ થી કમાઈ રહી છે. જેના કારણે સ્વયંની રોજીરોટી માટે ચિંતિત બહેનો, અન્ય યુવતિઓને તાલીમ અને રોજગારી પુરી પાડવા માટે પણ સક્ષમ બની છે.
ડાંગ જિલ્લાના સુબિર તાલુકામાં આવા ૧૧૧૬ જેટલા સખી મંડળો, અને ૬૬ સખી સંઘો ખૂબ જ સફળતાપૂર્વક આગળ વધી રહ્યા છે. ડાંગ જિલ્લાની ગ્રામીણ મહિલાઓ, બચત અને ધિરાણ પ્રવૃત્તિઓની સાથે સાથે અનેકવિધ આર્થિક ઉપર્જનના કાર્યમાં જોડાઈને, સાચા અર્થમાં આત્મનિર્ભર બની છે. જે સ્થળાંતર જેવા પ્રશ્ને ઝઝુમી રહેલા ડાંગ જિલ્લાની પૂર્વપટ્ટીના આ વિસ્તાર માટે ખૂબ જ આશીર્વાદરૂપ પુરવાર થઈ રહ્યું છે, તેમ પણ તેમણે ઉમેર્યું હતું.
