આહવા: તા: ૧૫: તા.૨૦મી માર્ચને ‘વર્લ્ડ સ્પેરો દિવસ’ તરીકે આખા વિશ્વમાં ઉજવવામાં આવે છે. આ દિવસની ઉજવણીના ભાગરૂપે ડાંગ વન વિભાગ દ્વારા તા.૧૮ અને ૧૯ માર્ચના રોજ કિલાદ ઇકો કેમ્પ સાઇટ-વઘઇ ખાતે ‘બર્ડ ફેસ્ટિવલ-૨૦૨૩’નું આયોજન કરાયું છે.
ડાંગ જિલ્લો એ કુદરતી વન સંપદાથી ભરપૂર જિલ્લો છે, અને તેથી જ અહી પક્ષીઓની વિવિધતા પણ જોવા મળે છે. પક્ષીઓનું જતન, સંવર્ધન, અને સંરક્ષણ કરવું એ આપણાં સૌની નૈતિક જવાબદારી બની રહે છે. આ બાબતે લોકોમાં વ્યાપક જાગૃતિ આવે તે માટે ખાસ કરીને બાળકો, વિધ્યાર્થીઓ, ગ્રામજનો અને શહેરીજનો ‘બર્ડ ફેસ્ટિવલ’ માં ભાગ લઈ શકે તે માટે ડાંગ વન વિભાગ તરફથી તેનું આયોજન કરાયું છે.
ડાંગ વન વિભાગના એ.સી.એફ. સુશ્રી આરતી ડામોરના જણાવ્યા અનુસાર ડાંગ જિલ્લાના પ્રવેશ દ્વાર એવા વઘઇ ખાતે આવેલી કિલાદ ઇકો કેમ્પ સાઇટ ખાતે વન વિભાગના ઉચ્ચ વરીસ્ઠ અધિકારીઓ, પક્ષીવિદો, તથા ક્ષેત્રિય કર્મીઓની ઉપસ્થિતિમાં યોજાનારા ‘બર્ડ ફેસ્ટિવલ’ દરમિયાન, નિષ્ણાંતો દ્વારા માહિતીપ્રદ વ્યાખ્યાન સહિત ભાગ લેનારા પક્ષીપ્રેમીઓની ટિમ બનાવી તેમને જાણકારોના સથવારે જંગલ ટ્રેલ પણ કરાવવામાં આવશે. જેમાં બાયનોક્યુલરની મદદથી પક્ષી નિરીક્ષણ કરાવી, પક્ષીઓના હેબિટાટ અને ફિજ્યોલોજી વિશે સ્થળ પર જાણકારી આપી, પક્ષી પ્રત્યેની અભિરુચિ કેળવી, તેઓને પક્ષી સંરક્ષણ વિશે જાગૃત કરવામાં આવશે. બર્ડ ફેસ્ટિવલ-૨૦૨૩’માં ભાગ લેવા માટે પક્ષીપ્રેમીઓને www.kiladcampsite.com ઉપર તા.૧૭મી માર્ચના રોજ સાંજના ૪ વાગ્યા સુધીમાં રજીસ્ટ્રેશન કરાવવા પણ અનુરોધ કરાયો છે.
