નસવાડી: ગતરોજ તાલુકાના સીમળિયા મતદાન મથકની મત પેટી ગાયબ થતાં પોલીસ સાથે ગ્રામજનોનું ઘર્ષણ થતા પોલીસે લાઠીચાર્જ કરતા આદિવાસી લોકોએ પોલીસ કાફલા ઉપર પથ્થરમારો કરતા અફડાતફડી મચી જવાની ઘટના બનવા પામી હોવાની જાણકારી મળી છે.
Decision Newsને મળેલી માહિતી મુજબ નસવાડી તાલુકાના અંબાડા ગ્રામ પંચાયતમાં (1) અંબાડા (2) સુકલીવાસણ (3) જામ્બા (4) વાંકી ખાખર (5) જાંબુઘોડા (6) કાળીયાપુરા (7) સીમળિયા ગ્રુપ પંચાયતમાં આવેલ છે તેમાંથી સીમળિયા ગામમાં મતદાન મથકેથી મતદાન પેટી અને ત્યાં નિયુક્ત થયેલા કર્મચારીઓ પણ ગાયબ હતા જેને લઈને ઉમેદવારો તથા સમર્થકો પેટી લેવા આવેલા ટેમ્પાને ઘેરી લીધો હતો અને ઉમેદવારો 2 કલાક સુધી મતપેટી શોધવા લાગ્યા હતા અને મતપેટી ન મળતા રોષે ભરાયેલા લોકોએ હોબાળો કર્યો હતો.
આ ઘટના ને કાબુમાં લેવા પોલીસનો કોફલો આવી પોહચતા રાત્રીના અંધકારમાં આદિવાસી મતદારો અને પોલીસ લોકો વચ્ચે ઘર્ષણ થતા પોલીસે લાઠીચાર્જ કર્યો હતો જેના જવાબમાં આદિવાસી લોકોએ પોલીસ ઉપર પથ્થર મારો કરતા અફડાતફડી મચી જવા પામી હતી. નસવાડી મામલતદારનું કહેવું છે કે સમગ્ર મામલાની તપાસ ચાલી રહી છે. મતપેટી ખાનગી વાહનમાં મતદાન મથકથી નીકળી છે અને તેની તપાસ ચાલી રહી છે. હાલ તો મતદાન પેટીને લઇને આદિવાસી લોકો અને પોલીસ આમને સામને આવી ગયા છે. ગામમાં સ્ફોટક પરિસ્થિતનું નિર્માણ થયું છે. સ્થિતિ હાલ કાબુમાં છે.
