ધરમપુર: ધરમપુર તાલુકાની મોટીઢોલ ડુંગરી ગમનજ પ્રાથમિક શાળાના વિદ્યાર્થીઓ માટે તા. ૦૬/૦૩/૨૦૨૬નો દિવસ ખૂબ જ આનંદદાયક અને જ્ઞાનવર્ધક રહ્યો. ગુજરાત ફોરેસ્ટ વિભાગના આદરણીય અધિકારી શ્રી શક્તિસિંહ ચાવડા સાહેબ તથા તેમની સમગ્ર ટીમે વિદ્યાર્થીઓને પ્રકૃતિના ખોળે એક અનોખો શૈક્ષણિક અનુભવ કરાવ્યો.
સવારથી જ વિદ્યાર્થીઓને પ્રેમપૂર્વક નાસ્તો કરાવવામાં આવ્યો અને ત્યારબાદ ખટાણા ગામ ખાતે આવેલા ફોરેસ્ટ વિસ્તારના ડુંગર પર ટ્રેકિંગનું આયોજન કરવામાં આવ્યું. ટ્રેકિંગ દરમિયાન ડુંગર પર કરવામાં આવેલા વૃક્ષારોપણ (પ્લાન્ટેશન) અંગે સરળ અને સમજણભરી રીતે માહિતી આપવામાં આવી. આનાથી બાળકોમાં પ્રકૃતિ પ્રત્યે પ્રેમ અને પર્યાવરણ સંરક્ષણની ભાવના વધુ મજબૂત થઈ. ત્યારબાદ રાજપુરી ગામ ખાતે આવેલી સેન્ટ્રલ નર્સરીની મુલાકાત લેવાઈ. અહીં વિવિધ પ્રકારના છોડ-વૃક્ષોની સંભાળ, તેમનું મહત્વ અને પર્યાવરણ માટેની ઉપયોગિતા અંગે વિગતવાર માર્ગદર્શન આપવામાં આવ્યું.
કાર્યક્રમના અંતે તમામ વિદ્યાર્થીઓને સ્નેહપૂર્વક ભોજન કરાવવામાં આવ્યું અને ફોરેસ્ટ ટીમે દર્શાવેલી આત્મીયતા ખરેખર પ્રશંસનીય રહી. આવા પ્રવાસો વિદ્યાર્થીઓના જીવનમાં માત્ર આનંદ જ નહીં, પરંતુ પર્યાવરણ જાગૃતિ અને પ્રકૃતિ સાથે જોડાણનો સારો અવસર પૂરો પાડે છે. શાળા પરિવાર તરફથી શ્રી શક્તિસિંહ ચાવડા સાહેબ તથા તેમની સમગ્ર ટીમનો દિલથી આભાર વ્યક્ત કરવામાં આવ્યો છે. આ અમૂલ્ય સહયોગ હંમેશા યાદગાર રહેશે. આ કાર્યક્રમ પર્યાવરણ જાગૃતિ અને શિક્ષણના સંયોજનનું ઉત્તમ ઉદાહરણ બની રહ્યો છે.
