ધરમપુર: આજરોજ ધરમપુર સ્થિત શ્રીમદ્ રાજચંદ્ર આશ્રમ ખાતે ત્રિદિવસીય રાજ્યકક્ષાના ચિંતન શિબિર 2025નું રવિવારે ભવ્ય સમાપન થયું. માનનીય મુખ્યમંત્રી શ્રી ભૂપેન્દ્ર પટેલની અધ્યક્ષતામાં તેમજ નાયબ મુખ્યમંત્રી શ્રી હર્ષ સંઘવીની પ્રેરક ઉપસ્થિતિમાં આ સમાપન સમારોહ યોજાયો હતો.
DECISION NEWS ને મળેલી જાણકારી પ્રમાણે સમાપન પ્રસંગે મુખ્યમંત્રીશ્રીએ અધિકારીઓ તેમજ પદાધિકારીઓને “અર્નિંગ વેલ, લિવિંગ વેલ” (સારી કમાણી કરો, સારું જીવન જીવો ) નો મહત્ત્વપૂર્ણ મંત્ર આપતાં કહ્યું કે, “વિકસિત ગુજરાતના માધ્યમથી વિકસિત ભારતનું નિર્માણ કરવું એ આપણું સૌનું કર્તવ્ય છે. આ માટે દરેકે પોતાના ક્ષેત્રમાં સંપૂર્ણ નિષ્ઠા અને પારદર્શિતા સાથે કામ કરવું જોઈએ.”ત્રણ દિવસ સુધી ચાલેલા આ ચિંતન શિબિરમાં રાજ્યના વિવિધ વિભાગોના અધિકારીઓએ ભાગ લીધો હતો અને વિકસિત ગુજરાત 2047ના લક્ષ્યાંકો, નાગરિક સેવાસાયતી, આર્થિક વિકાસ, ઈન્ફ્રાસ્ટ્રક્ચર, શિક્ષણ-આરોગ્ય તેમજ પર્યાવરણ જેવા મહત્ત્વના મુદ્દાઓ પર ઊંડું મંથન કરવામાં આવ્યું હતું.
મુખ્યમંત્રીશ્રીએ વિશ્વાસ વ્યક્ત કર્યો કે, “આ શિબિરમાં થયેલું સામૂહિક ચિંતન અને નિર્ણયો રાજ્યના વિકાસને વધુ વેગ આપશે તેમજ દરેક નાગરિકના જીવનમાં સુખાકારી અને સમૃદ્ધિનો વધારો કરશે.” આ તકે ઉપસ્થિત તમામે મુખ્યમંત્રીશ્રીના માર્ગદર્શનથી પ્રેરિત થઈ વિકસિત ભારતના નિર્માણ માટે સંકલ્પબદ્ધ થયા હતા. નાણામંત્રી શ્રી કનુભાઈ દેસાઈ, ગૃહ તેમજ પરિવહન રાજ્યમંત્રી શ્રી હર્ષ સંઘવી, રાજ્યકક્ષાના અન્ય મંત્રીઓ, નેતાઓ, વરિષ્ઠ અધિકારીઓ તેમજ મોટી સંખ્યામાં પદાધિકારીઓ આ સમાપન સમારોહમાં ઉપસ્થિત રહ્યા હતા.
