ડાંગ: આજરોજ ડાંગ કોંગ્રેસ સમિતિના પ્રમુખ સ્નેહલ ઠાકરે દ્વારા સરદાર સાહેબની ગરિમા જાળવવાં જે પ્રતિમા મૂકવામાં આવી છે તેનું આજદિન સુધી સંપૂર્ણ કામ ન કરવામાં આવતા આક્રોશ સાથે આવેદનપત્ર આપવામાં આવ્યું હતું.
સ્નેહલ ઠાકરે જણાવે છે કે ગત દિવસોમાં સરદાર પટેલ સાહેબની 150 ની જયંતિ જન્મજયંતીના ઉપલક્ષમાં સરકારશ્રી દ્વારા મોટા ઉપાડે રન ફોર યુનિટી અને યુનિટી માર્ચ જેવા ઘણા બધા કાર્યક્રમો કરવામાં આવ્યા હતા અને એમાં પણ આહવા આંબાપડા ચાર રસ્તા ખાતે સરદાર સાહેબની જૂની પ્રતિમા હટાવી મોટી પ્રતિમા મૂકવામાં આવી હતી. ગર્વની વાત છે કે દેશના મહાપુરુષો માટે સરકાર દ્વારા આવા ખાસ કાર્યક્રમ કરવામાં આવે છે, પરંતુ આજે ખૂબ જ ગંભીર બાબત જાણવા મળી છે કે સરદાર સાહેબની પ્રતિમા મૂકી દીધા બાદ આજ દિન સુધી સંપૂર્ણ કામ કરવામાં આવ્યું નથી, અને એ પ્રતિમાની જગ્યાએ નવીનીકરણના નામે વેઠ ઉતારવામાં આવી રહી છે, ઉપરાંત ભૂતકાળમાં જે જગ્યા પરિસરમાં બાંધકામ હતું તે નાનું કરી નવી દિવાલ બનાવવાની તજવીત હાથ ધરવામાં આવી રહી છે જે ખૂબ જ દુઃખની બાબત છે
વધુમાં કહ્યું કે સરદાર સાહેબની પ્રતિમા જે સ્થળે હતી અને જે ત્રિજ્યામાં બાંધકામ હતું તેટલા જ પરિસરમાં નવું બાંધકામ એ મુજબ થવા જોઈએ. જો સરદાર સાહેબની જગ્યા એક ઇંચ પણ ઓછી થશે તો એ કોઈપણ ભોગે સાંખી લેવામાં નહીં આવે અને જો તંત્ર દ્વારા આ બાબતે સત્વરે પગલા લેવામાં નહીં આવે તો અમો તરફથી ઉગ્ર આંદોલનો થશે જેની તમામ જવાબદારી તમારી તંત્રની રહેશે.
