રાજપીપળા: ગતરોજ રાજપીપળાની નવદુર્ગા હાઈસ્કૂલ ખાતે મનસુખ વસાવાએ શિક્ષણ મુદે જણાવ્યું હતું કે હાઈસ્કૂલમાં આવતા બાળકોને વાંચતા લખતા નથી આવડતું. સ્પર્ધાત્મક પરીક્ષામાં વસાવા અને રાઠવા લોકો આગળ નથી આવતા, આ સમાજ સ્ટાર બેન્ડ માંથી ઊંચો નથી આવતો.
Decision News ને મળેલી માહિતી મુજબ ભાજપ સાંસદ મનસુખ વસાવા વાલિયા ખાતેના કરોડો રૂપિયાના ખર્ચે બનવા જઈ રહેલ બ્રિજના ભુમિ પુજનના કાર્યક્રમના સમયનો ફેરફાર કરી બાળ વૈજ્ઞાનિક પ્રદર્શનમાં ઉપસ્થિતિ રહ્યા હતા. આ કાર્યક્રમમાં નર્મદા જિલ્લા પંચાયત પ્રમુખ, નાંદોદ તથા ડેડીયાપાડા ધારાસભ્ય અને બંને શિક્ષણાધિકારીઓને ગેરહાજર જોતા મનસુખ વસાવા અકળાયા હતા.
મનસુખ વસાવાએ કહ્યું કે હું આકરું બોલું છું એટલે અધિકારીઓ હાજર નથી રહેતા. ધારાસભ્ય ચૈતર વસાવા મત લેવા માટે રાજ્યના આદિવાસી પટ્ટામાં સભાઓ કરે છે પણ બાળકોના કાર્યક્રમની ચિંતા નથી. ચૈતર વસાવા આખા ગુજરાતમાં ફરે છે તો પોતાનું ઘર સાચવોને ગુજરાતમાં શુ ફર્યા કરો છો. લંડનથી પંજાબમાં કરોડો રૂપિયા આદિવાસીઓમાં ભાગલા પાડવા તથા દેશ વિરોધી કામગીરી કરવા ભારતમાં આવે છે, અને આપણા કહેવાતા નેતાઓ એનો ઉપયોગ કરી આદિવાસીઓને ભરમાવે છે. આપણે નમાલા બનીને નથી રહેવાનું..
