વલસાડ: આંગણવાડીની બિસ્માર હાલતની કલેકટરને ફરિયાદનાં સમાચાર વાયરલ થતાં ઉશ્કેરાયેલા ધનોરી ગામના સરપંચપતિ ચિરાગ પટેલે તીઘરા ગામના સામાજિક આગેવાન મુકેશ પટેલ અને એની પત્નિ સવિતા પટેલ પર હુમલો કરી જાનથી મારી નાખવાની ધમકી આપવાની ઘટનાથી ચકચાર મચી જવા પામી છે.
ફરિયાદ મુજબ ધનોરી ગામની બિસ્માર હાલતમાં રહેલી આંગણવાડીનાં વીડિયો અને સમાચાર વાયરલ થતાં ધનોરી ગ્રામપંચાયતનાં સરપંચ રોશનીબેન પટેલનાં પતિ ચિરાગ પટેલનાં મગજનો પારો છટક્યો હતો અને તારિખ 25/11/2025 ના રોજ સાંજના સુમારે આંગણવાડીની બિસ્માર હાલત સુધારવામાં મદદરૂપ થવા માટે ગ્રામપંચાયતનો ઠરાવ માંગનાર સામાજિક મુકેશભાઈને તેના ઘરે જઈ હુમલો કરી જાનથી મારી નાખવાના ધમકી આપતાં ચકચાર મચી ગઈ હતી.આ બાબતે મીડિયા સાથેની વાતચીતમાં ફરિયાદી મુકેશભાઈ પટેલે કરેલી ફરિયાદ બાબતે જણાવ્યું હતું કે આંગણવાડીનાં રીપેરિંગ બાબતની વર્ષો જૂની સમસ્યાનાં નિરાકરણના પ્રયાસરૂપે ગ્રામજનો પાસેથી નંબર મેળવીને ધનોરી ગામના સરપંચપતિ ચિરાગભાઈ પટેલ જેઓ સરપંચ રોશનીબેનના બદલે પોતે જ સરપંચપતિ(એસપી) તરીકે વહીવટ કરતા આવેલ હોય એમને ધનોરી ગામની આંગણવાડીઓની બિસ્માર હાલત વિશે રજુઆત કરી તેમની પાસે આંગણવાડીઓના રીપેરીંગ કરવા માટે ગ્રામસભામાં ઠરાવ કરેલ હોય તો તેની નકલ માંગવા ફોન કરેલ જેથી ચિરાગભાઈ પટેલ એકદમ ઉશ્કેરાઇ ગયેલ અને જણાવેલ કે મુકેશભાઈ તારે મારા ગામની મેટરમાં પડવાની શુ જરૂર છે અને અસભ્ય ભાષા વાપરેલ અને થોડીવારમાં અમારા ઘરમાં ધસી આવી સીધો મારો કોલર પકડી ઢીક્કામુક્કી કરી મારવાની કોશિશ કરી ગાળાગાળી કરી બીભત્સ શબ્દોમાં જણાવેલ કે મુકેશ હરામખોર,તારી મારા ગામમાં આવી આંગણવાડીની રજૂઆતના નામે મીડિયામાં સમાચારો છપાવી મારી બદનામી કરવાની શું જરૂર હતી.
આ સમાચાર છપાવાના લીધે મારી મારા ગામમાં કેટલી બદનામી થઈ એનું તને કઈ ભાનબાન છે કે અને ઉપરથી મને કેટલી ગાળો પડી તે બોનસમાં,તારે મારા ગામમાં આવીને દોઢડાહ્યા થવાની શું જરૂર હતી?મારા ગામનાં છોકરાઓ ભણે કે ની ભણે તારે બાપ નું શું જાય ની ભણશે તો મજૂરીએ જશે કે ઢોર ચારવા પણ તું થોડો ખવડાવવા આવવાનો છે.હવે જો મારા ગામમાં આવ્યો તો તારા હાથ-ટાંટીયા તોડી નાખીશ અને સ્કોર્પિયો નીચે કચડી નાંખા એમ બોલીને ગંદી ગાળાગાળી કરી ફરી મારો કોલર પકડી મને મારવાની કોશિશ કરતા મારી પત્ની સવિતાબેન એને અટકાવવાની કોશિશ કરતા સવિતાબેનને ધક્કો મારી પત્નિ સવિતાબેનને ખૂબ જ અભદ્ર ભાષામાં મહિલાઓની ગરીમા લાજે એવી ગંદી ગાળાગાળી કરી ધક્કો મારી દેતા સવિતાબેન પડી ગયેલા.આથી હિંસક બનેલ સરપંચપતિ ચિરાગભાઈ પટેલથી બચવા અમે ઇમરજન્સી હેલ્પલાઇન 112 નંબર પર ફરિયાદ કરવાની કોશિશ કરતા,એણે મારો ફોન છીનવી લીધેલ અને જણાવેલ કે મુકલા તું પોલીસને ફોન કરે કે જેને ફોન કરે, કોઈ બાપ મારું કંઈ તોડી લેવાનું નથી.તું જાણતો છે ને કે મારા કોન્ટેક્ટ કેટલા છે અને પોલીસને તો મેં મારા ખિસ્સામાં લઈને ફરું છું એમ બોલીને ગંદી ગાળાગાળી કરતા ઘરમાંથી નીકળી ગયેલ અને જતા જતા બોલેલ કે પોલીસ ફરિયાદ કરી તો આજે તો એકલો જ આવ્યો છું,પણ બીજીવાર માણસો લઈને આવીશ અને તને અને તારું ઘરબાર બધું સળગાવી દઈશ.
ધનોરીના સરપંચપતિ ચિરાગ પટેલનાં આ હુમલા વિરુદ્ધ મુકેશ પટેલે ડુંગરી પોલિસ સ્ટેશનમાં ફરિયાદ કરી છે અને વલસાડ જિલ્લા વિકાસ અધિકારી અને વલસાડ તાલુકા વિકાસ અધિકારીને પણ નકલ વધુ કાર્યવાહી અર્થે રવાના કરી હતી.હવે જોવાનું એ રહ્યું છે કે એકબાજુ આખા રાજયની ચિંતન શિબિર વલસાડ જિલ્લામાં યોજાવા જઈ રહી છે ત્યારે વલસાડ જિલ્લાનાં ધનોરી ગામના સરપંચનું આવું વલણ કેટલું વ્યાજબી?આ બાબતે ડુંગરી પોલિસ શુ કાર્યવાહી કરે તેનાં પર સૌની નજર ટકેલી છે.
