ઉમરગામ: ઉમરગામ પાલિકાએ ગૌરવ પથ ઉપર પ્લાસ્ટિકના સ્પીડ બ્રેકર લગાવ્યાને જૂજ વાહનો પસાર થતાની સાથે જ ગણતરીના કલાકોમાં આ સ્પીડ બ્રેકર પાપડની જેમ કચડાઈને ઉખડી જતા ત્રણ કરોડોના ખર્ચે નિર્માણ પામેલા આઇકોનિક રોડની કામગીરી સામે અનેક સવાલો ઉપસ્થિત થયા છે. ઉમરગામ શહેરને જોડતા મુખ્ય માર્ગ જેને પાલિકાએ ભૂતકાળમાં ગૌરવ પથ જાહેર કરી ડિવાઈડર, સ્ટ્રીટ લાઈટ, ફૂથ પાથ જેવી સુવિધા સાથેની કામગીરી કરી હતી.
Decision News ને મળેલી માહિતી મુજબ જે તે સમયે ગૌરવ પથ ઉપર ચોમાસામાં પાણીના નિકાલનો પ્રશ્ન સર્જાતા ગૌરવ પથની ઘણી ટીકા થઈ હતી ફરી એને એજ માર્ગ ઉપર પાલિકાએ જુની સ્ટ્રીટ લાઇટ પોલ અને ડિવાઇડર હટાવી નવેસરથી એજ પ્રકારની કામગીરી કરી ત્રણ લાખ રૂપિયાના ખર્ચે કામગીરી કરવામાં આવી છે જેના ભાગ રૂપે શનિવારે રાત્રે ટ્રાફિક હળવો હોય રેડીમેડ પ્લાસ્ટિક સ્પીડ બ્રેકર લગાવવામાં આવ્યા હતા.
જો કે રવિવારે સવારે તમામ સ્પીડ બ્રેકરો વાહન પર પસાર થવાથી કચડાયેલી સ્થિતિમાં જોવા મળ્યા હતા. આ દ્રશ્યથી નગરજનો પાલિકાની કામગીરી સામે અનેક સવાલો ઉપસ્થિત કર્યા છે. લોકોની ચર્ચા મુજબ લગાવવામાં આવેલા સ્પીડ બ્રેકર હલકી ગુણવત્તાવાળા તેમજ શૂટિંગ સેટમાં વપરાતાં સ્પીડ બ્રેકર લગાડવામાં આવ્યા હતા.
