ભરૂચ: ભરૂચના માતરીયા તળાવ વિસ્તારમાં ગુજરાત પ્રદૂષણ નિયંત્રણ બોર્ડ (GPCB)એ પ્લાસ્ટિક મુક્ત ભારત અભિયાન અંતર્ગત વિશેષ સ્વચ્છતા કાર્યક્રમનું આયોજન કર્યું હતું. આ અભિયાનમાં GPCBના કર્મચારીઓ, નગરપાલિકા અને વન વિભાગના કર્મચારીઓ સહિત 200થી વધુ નાગરિકોએ ભાગ લીધો હતો.
કાર્યક્રમ દરમિયાન શ્રવણ ચોકડી સુધીના વિસ્તારમાંથી સિંગલ યુઝ પ્લાસ્ટિકનો કચરો એકત્રિત કરવામાં આવ્યો હતો. આ કચરો નગરપાલિકાને સોંપવામાં આવ્યો. GPCBએ સહભાગીઓને ટોપી, કાપડની થેલી અને તુલસીના છોડનું વિતરણ કર્યું હતું. આ દ્વારા લોકોને પ્લાસ્ટિક મુક્ત જીવનશૈલી અપનાવવા પ્રેરિત કરવામાં આવ્યા હતા.
GPCBના રિજનલ ઓફિસર કે.એન. વાઘમશીએ પ્લાસ્ટિક પ્રદૂષણ વિશે માહિતી આપી. તેમણે પર્યાવરણ જાળવણી માટે લોકોને જાગૃત કર્યા. તમામ સહભાગીઓએ પ્લાસ્ટિકનો યોગ્ય નિકાલ કરવા અને પ્લાસ્ટિક મુક્ત ભારત માટે પ્રતિજ્ઞા લીધી. વાઘમશીએ શહેરને સ્વચ્છ અને પર્યાવરણ મૈત્રી બનાવવા આવા કાર્યક્રમોની નિયમિતતા અને સામૂહિક સહયોગની આવશ્યકતા પર ભાર મૂક્યો.
