નર્મદા: નર્મદા જિલ્લાના ડેડીયાપાડા તાલુકામાં બે કરુણ આત્મહત્યાની ઘટનાએ સમગ્ર વિસ્તારને હચમચાવી નાખ્યો છે. દાભવણ ગામની 15 વર્ષીય કિંજલબેન મહેશભાઈ તડવી અને સામરપાડા ગામના 70 વર્ષીય શંકરભાઈ વસાવાએ અલગ અલગ કારણોસર આત્મહત્યા કરી લીધી છે.
Decision news ને મળેલી માહિતી મુજબ દાભવણ ગામના તળાવ ફળિયામાં રહેતી કિંજલબેન પર ગામના બંસીભાઈ બાલુભાઈ તડવીએ તેમની પુત્રીના સાંકળા ચોરવાનો આરોપ મૂક્યો હતો. આ આક્ષેપથી હેરાન થઈને કિંજલબેને ઘર નજીકના ઊંડા કૂવામાં કૂદીને જીવન ટૂંકાવ્યું હતું. બીજી તરફ, સામરપાડા ગામના શંકરભાઈ વસાવા છેલ્લા સાત વર્ષથી એકલા રહેતા હતા. તેમની પત્નીના અવસાન બાદ એકલતાથી કંટાળીને તેમણે ઝેરી દવા પી લીધી હતી.
પ્રાથમિક સારવાર માટે તેમને 108 એમ્બ્યુલન્સ દ્વારા ડેડીયાપાડા સરકારી હોસ્પિટલ લઈ જવાયા હતા. ત્યાર બાદ તબિયત વધુ લથડતાં રાજપીપલા સિવિલ હોસ્પિટલ ખસેડવામાં આવ્યા, જ્યાં સારવાર દરમિયાન તેમનું મૃત્યુ થયું હતું. ડેડીયાપાડા પોલીસે બંને કેસમાં આત્મહત્યાનો ગુનો નોંધી વધુ તપાસ શરૂ કરી છે. આ ઘટનાઓએ સમાજમાં માનસિક સ્વાસ્થ્ય અને સામાજિક સંવેદનશીલતાના મુદ્દાઓ પર ધ્યાન દોર્યું છે.
