સેલવાસ: સરકારી ઉચ્ચતર માધ્યમિક શાળા ટોકરખાડા (EM) ખાતે આજે તમાકુ મુક્ત યુવા અભિયાન 2.0 શરૂ કરવામાં આવ્યું હતું. આ કાર્યક્રમ આરોગ્ય અને શિક્ષણ વિભાગના સંકલનમાં યોજવામાં આવ્યો હતો. મદદનીશ કલેક્ટર શ્રી પિયુષ કુમારે કાર્યક્રમનું ઉદ્ઘાટન કર્યું હતું.
Decision News ને મળેલી માહિતી મુજબ આ કાર્યક્રમમાં શિક્ષણ અધિકારી અને ટોકરખાડા શાળાના મુખ્ય શિક્ષક પણ ઉપસ્થિત રહ્યા હતા, તેમણે ઉમેર્યું હતું કે આ વર્ષનું 60 દિવસનું અભિયાન પાંચ મુખ્ય ક્ષેત્રોને પ્રાધાન્ય આપે છે. તમાકુના જોખમો અંગે જાગૃતિ તે પણ ખાસ કરીને યુવાનો અને ગ્રામીણ સમુદાયોમાં,શાળાઓ અને કોલેજો તમાકુ મુક્ત રહે તે સુનિશ્ચિત કરવા માટે તમાકુ મુક્ત શૈક્ષણિક સંસ્થાઓ (TOFEI) માટેની સુધારેલી માર્ગદર્શિકાના પાલનમાં સુધારો, તમાકુ નિયંત્રણ કાયદાના અમલીકરણને મજબૂત બનાવવું, ખાસ કરીને COTPA 2003 અને પ્રોહિબિશન ઓફ ઇલેક્ટ્રોનિક સિગારેટ એક્ટ (PECA) 2019, યુવાનોને તમાકુના વપરાશને મર્યાદિત કરવા,તમાકુ મુક્ત ગામોને પ્રોત્સાહન આપવું, જ્યાં લોકોને તમાકુથી દૂર કરવા અને તંદુરસ્ત વાતાવરણ બનાવવા માટે સાથે મળીને કામ કરવું,યુવાનોને તમાકુના નુકસાન અને છોડવાના ફાયદાઓ વિશેના સંદેશા પહોંચાડવા ડિજિટલ પ્લેટફોર્મનો ઉપયોગ કરીને સોશિયલ મીડિયા આઉટરીચને પ્રોત્સાહન આપવું.
આ કાર્યક્રમમાં સાયકલ રેલીનું પણ આયોજન કરવામાં આવ્યું હતું. જેમાં 50 જેટલા વિદ્યાર્થીઓએ ભાગ લીધો હતો. આ રેલી ટોકરખાડા હાઈસ્કૂલથી કલેક્ટર કચેરી સુધી કાઢવામાં આવી હતી.કલેકટર કચેરીએ પહોચી મદદનીશ કલેકટર શ્રી પીયુષ કુમારે વિદ્યાર્થીઓને કચેરીના પ્રવાસે લઇ જઇ સરકારી કામોની માહિતી આપી હતી. તેમણે વિદ્યાર્થીઓને અભ્યાસમાં ધ્યાન કેન્દ્રિત કરવા અને જીવનભર તમાકુથી દૂર રહેવા પ્રેરણા આપી હતી.શ્રી કુમારે તેમના સંબોધનમાં વિદ્યાર્થીઓને તમાકુ મુક્ત સંદેશના એમ્બેસેડર બનવા અને તેમના પરિવારો, પડોશીઓ અને સમાજમાં આ જાગૃતિ ફેલાવવા વિનંતી કરી. તેમણે કહ્યું, તમે અમારા રાષ્ટ્રનું ભવિષ્ય છો, અને તમાકુથી દૂર રહીને તમે માત્ર તમારા સ્વાસ્થ્યનું જ રક્ષણ નથી કરતા, પરંતુ અન્ય લોકો માટે એક સકારાત્મક ઉદાહરણ પણ સ્થાપિત કરો છો.
