દાનહ: ગતરોજ દાનહમાં ગઈકાલથી ભારે વરસાદ વરસી રહ્યો છે જેના કારણે જનજીવન પ્રભાવિત થયું હતું. ભારે વરસાદના કારણે પીપરિયા સનફાર્મા કંપની પાસે વૃક્ષ પડતા બે બાઈક ચાલકનો બચાવ થયો હતો.નરોલી રોડ ઉપર પણ વૃક્ષ પડતા રસ્તો બંધ થયો હતો.
Decision News ને મળેલી માહિતી મુજબ દાનહમાં વિવિધ જગ્યા એ રોડ પર વૃક્ષો પડતા વાહનવ્યવહારમાં મુશ્કેલી પડી હતી. ભારે વરસાદથી નદી નાળા છલકાયા હતા અને રસ્તા ઉપર પાણી ભરાયા હતા. રસ્તા ઉપર પાણી ભરાતા અને ખરાબ રસ્તાને કારણે વાહન ચાલકો મુશ્કેલીમાં મુકાયા હતા. દાનહના કિલવણી ખાતે રસ્તા ઉપર ભેખડ પડી જતા એક બાજુથી રસ્તો બંધ થયો હતો.
દાદરા ગાર્ડન પાસે પણ વૃક્ષ પડી જતા રસ્તો બંધ થયો હતો. સેલવાસ ડિઝાસ્ટર મેનેજમેન્ટની ટીમ ઘટના સ્થળે પહોંચી હતી અને વૃક્ષને કાપીને રસ્તો પુનઃ શરૂ કર્યો હતો. આમ દાનહમાં ભારે વરસાદના કારણે જનજીવન પ્રભાવિત થયાનું જાણવા મળ્યું છે.
