ગતરોજ 16 ઓગષ્ટે પારસીઓ નવું વર્ષ નવરોઝની ઉજવણી કરી છે ત્યારે વલસાડમાં પારસીઓન મોટા ધર્મગુરુ દસ્તુરે યુનિફોર્મ સિવિલ કોડ-UCC અંગે મોટું નિવેદન આપ્યું છે. વલસાડમાં પારસી ધર્માંગુરુ દસ્તુરે કહ્યું કે સરકાર જો યુનિફોર્મ સિવિલ કોડ લાવશે તો પારસી કોમ તેને હર્ષભેર આવકારશે.
તેમણે કહ્યું કે યુનિફોર્મ સિવિલ કોડ-UCCથી પારસીઓના કેટલાક રિવાજોને પણ તેની અસર થઈ શકે છે, તેમ છતાં દેશ હિતમાં પારસીઓ પોતાની કોમની આંતરિક સમસ્યાનું પણ સમાધાન કરી UCC સ્વાગત કરશે. આજે પારસીઓ દેશની સૌથી માઇક્રો માઈનોરિટી છે. પારસીઓની વસ્તી વધતી ન હોવાથી અત્યારે કોમ અસ્તિત્વ ટકાવી રાખવા સંઘર્ષ કરી રહી છે. તેમ છતાં દેશમાં UCC ના કાયદાને હર્ષભેર આવકારવા પારસીઓમાં અત્યારથી જ થનગનાટ છે. બંધારણની કલમ 144 UCC સાથે સંબંધિત છે. એવું કહેવામાં આવ્યું છે કે સમાન કાયદો બધા પર લાગુ થવો જોઈએ. પરંતુ સૌથી મોટી વાત એ છે કે હાલમાં બંધારણમાં તેનો ઉલ્લેખ ચોક્કસપણે કરવામાં આવ્યો છે, પરંતુ તે માર્ગદર્શિકાની જેમ જ છે, તેને જરૂરી માનવામાં આવ્યું નથી. જો ભારતમાં યુનિફોર્મ સિવિલ કોડ લાગુ કરવામાં આવશે, તો દરેક ધર્મ માટે સમાન કાયદાઓ લાગુ થશે. કાયદામાં એક શબ્દનો ઘણી વખત ઉપયોગ થાય છે – પર્સનલ લો. પર્સનલ લો એ છે જે ધર્મ, જાતિ, આસ્થાના આધારે તૈયાર કરવામાં આવે છે. લગ્ન, છૂટાછેડા, દત્તક, પારિવારિક મિલકત, વસિયત જેવી તમામ બાબતો હજુ પણ પર્સનલ લો હેઠળ આવે છે.
યુનિફોર્મ સિવિલ કોડના સમર્થનમાં એક વાત હંમેશા કહેવામાં આવે છે કે તેનાથી લિંગ સમાનતા વધશે, હાલમાં ધર્મના નામે જે ભેદભાવ થાય છે તે પણ ઘટશે. આ ઉપરાંત હવે જે અલગ અલગ કાયદાનો અમલ થઈ રહ્યો છે તેમાં પણ ઘણી હદ સુધી ઘટાડો થશે, જેના કારણે ન્યાયતંત્રમાં સરળતા આવશે.
કેટલાક બૌદ્ધિકો માને છે કે યુસીસીના અમલીકરણ સાથે ધાર્મિક સ્વતંત્રતા પણ સમાપ્ત થઇ જશે. એવી દલીલ કરવામાં આવે છે કે બંધારણે જ ધર્મની સ્વતંત્રતા આપી છે, આવા કિસ્સામાં UCC લાગુ ન થઈ શકે. યુનિફોર્મ સિવિલ કોડનો ઈતિહાસ સ્વતંત્ર ભારત પહેલાનો છે. આ વાત 1835ની છે જ્યારે અંગ્રેજો માનતા હતા કે ભારતને યુનિફોર્મ સિવિલ કોડની જરૂર છે. ત્યારબાદ તેમણે એક રિપોર્ટ આપ્યો જેમાં કહેવામાં આવ્યું હતું કે ગુના, પુરાવા, કરાર જેવી બાબતોમાં સામાન્ય કાયદો હોવો જોઈએ, પરંતુ હિંદુઓ અને મુસ્લિમોના પર્સનલ લોને ખલેલ પહોંચાડવી જોઈએ નહીં.
