પૂર્વ કેન્દ્રીય મંત્રી બાબુલ સુપ્રિયોએ ભાજપને મોટો ઝટકો આપ્યો છે. બાબુલ સુપ્રિયો શનિવારે TMC ના મહાસચિવ અભિષેક બેનર્જી અને પક્ષના સાંસદ ડેરેક ઓબ્રાયનની હાજરીમાં તૃણમૂલ કોંગ્રેસમાં જોડાયા. બાબુલ સુપ્રિયોને તાજેતરમાં કેન્દ્રીય મંત્રીમંડળમાં મોટાપાયે ફેરબદલ દરમિયાન પદ પરથી દૂર કરવામાં આવ્યા હતા. સુપ્રિયો બંગાળની આસનસોલ બેઠક પરથી સાંસદ છે. સુપ્રિયો એવા સમયે તૃણમૂલમાં જોડાયા છે જ્યારે કોલકાતામાં ભવાનીપુર બેઠક પરથી વિધાનસભાની પેટા ચૂંટણી યોજાઈ રહી છે, જ્યાંથી મુખ્યમંત્રી મમતા બેનર્જી પોતે ઉમેદવાર છે. તાજેતરમાં જ ભાજપના ચાર ધારાસભ્યો તૃણમૂલ કોંગ્રેસમાં જોડાઈ ચૂક્યા છે.

બાબુલ સુપ્રિયોને આશરે બે મહિના પહેલા પર્યાવરણ મંત્રાલયમાં રાજ્યમંત્રી પદેથી રાજીનામું આપવાનું કહેવામાં આવ્યું હતું. જો કે, ભાજપના ભૂતપૂર્વ સાંસદે કેન્દ્રીય મંત્રી પદેથી રાજીનામું આપ્યા બાદ કહ્યું હતું કે તેઓ કોઈ પણ પક્ષમાં જોડાશે નહીં અને રાજકારણ છોડી દેશે. બાદમાં તેમણે સંસદ સભ્ય રહેવાનું સ્વીકાર્યું.

બાબુલ સુપ્રિયો ચૂંટણી જીતનાર મમતા બેનર્જી પછી પાંચમા નેતા છે, જેમણે ભાજપ છોડીને તૃણમૂલ કોંગ્રેસમાં જોડાવાનો નિર્ણય કર્યો છે. અન્ય ચાર નેતાઓ ધારાસભ્ય છે. બાબુલ સુપ્રિયોનું તૃણમૂલ કોંગ્રેસમાં જોડાવાનું ભાજપ માટે મોટો આંચકો માનવામાં આવી રહ્યો છે.

વડાપ્રધાન નરેન્દ્ર મોદીના નેતૃત્વવાળી સરકારમાં 43 નવા મંત્રીઓને કેબિનેટમાં સામેલ કરવામાં આવ્યા અને ઘણા મંત્રીઓને દૂર કરવામાં આવ્યા. સુપ્રિયો કેબિનેટ છોડનારાઓમાં પણ હતા અને ત્યારથી તેઓ પાર્ટીથી નારાજ હોવાનું કહેવાય છે.


RELATED ARTICLESMORE FROM AUTHOR