સુરત: સુરત મહાનગરપાલિકા સંચાલિત નગર પ્રાથમિક શિક્ષણ સમિતિ દ્વારા શિક્ષણ ક્ષેત્રે મોટું કામ કરવામાં આવી રહ્યું છે. દેશની એકમાત્ર એવી મહાનગરપાલિકા છે જે ધોરણ 10, 11 અને 12 સુધી વિદ્યાર્થીઓને અભ્યાસની વ્યવસ્થા કરી રહી છે. ગરીબ અને મધ્યમ વર્ગના બાળકો માટે સુમન શાળા આજે આશીર્વાદરૂપ થઈ રહી છે.ગરીબ તેજસ્વી વિદ્યાર્થીઓ અહીં ખૂબ સારા માર્ક્સ લાવીને ધોરણ 10 અને 12ની બોર્ડની પરીક્ષા પણ પાસ કરી રહ્યા છે.
સુરત મહાનગરપાલિકા સંચાલિત નગર પ્રાથમિક શિક્ષણ સમિતિમાં અત્યાર સુધી ધોરણ 8થી 9 સુધી ભણતા લાખો વિદ્યાર્થીઓને પોતાના ફંડમાંથી વિદ્યાર્થીઓને કરોડો રૂપિયાના ખર્ચે દર વર્ષે બે યુનિફોર્મ, એક સ્પોર્ટ્સ યુનિફોર્મ અને શૂઝ આપવાનો નિર્ણય કરવામાં આવ્યો હતો. હવે તેનાથી પણ આગળ વધીને ધોરણ 10, 11 અને 12માં ભણતા વિદ્યાર્થીઓને પણ યુનિફોર્મ આપવાનો નિર્ણય કરવામાં આવ્યો છે. માત્ર બે યુનિફોર્મ નહીં પરંતુ સાથે-સાથે સ્પોર્ટ્સ માટે એક યુનિફોર્મ અને બુટ-મોજા પણ આપવામાં આવશે. નગર પ્રાથમિક શિક્ષણ સમિતિ યુનિફોર્મ પાછળ જે ખર્ચ કરોડો રૂપિયાનો કરી રહી છે, એમાંથી રાજ્ય સરકારની કોઈપણ પ્રકારની ગ્રાન્ડ મળતી નથી, એ પોતાના ભંડોળમાંથી જ આ ખર્ચ કરી રહી છે.
Decision news ને મળેલી માહિતી મુજબ સ્થાયી સમિતિના ચેરમેન રાજન પટેલે જણાવ્યું કે, નગર પ્રાથમિક શિક્ષણ સમિતિમાં અલગ-અલગ ભાષાઓનું શિક્ષણ આપવામાં આવે છે. ધોરણ નવ સુધી તમામ પ્રકારની વ્યવસ્થા કરવામાં આવી રહી છે. ખાસ કરીને યુનિફોર્મ પાછળ લગભગ 35 કરોડ રૂપિયા કરતાં વધારેનો ખર્ચ સુરત મહાનગરપાલિકાએ કર્યો છે. આવનાર દિવસોમાં એટલે કે, નવા શૈક્ષણિક ક્ષેત્રથી ધોરણ 10, 11 અને 12માં કુલ 16000 જેટલા વિદ્યાર્થીઓ સુરત મહાનગરપાલિકામાં અભ્યાસ કરી રહ્યા છે. આ તમામ વિદ્યાર્થીઓને હવે ગણવેશ આપવાનો નિર્ણય કરવામાં આવ્યો છે.
દરેક વિદ્યાર્થીને બે ગણવેશ અને એક્સપોર્ટ યુનિફોર્મ આપવામાં આવશે, જેની પાછળનો કુલ ખર્ચ 8 કરોડ કરતાં વધારેનો થવાનો છે. ગરીબ અને મધ્યમ વર્ગના વિદ્યાર્થીઓને સારું શિક્ષણ મળે તે માટે માત્ર શિક્ષણ નહીં, પરંતુ તેમની અન્ય જરૂરિયાતની સુવિધા પણ ઊભી કરવાના મક્કમ નિર્ણય સાથે અમે આગળ વધી રહ્યા છે. શક્ય તેટલી તમામ વ્યવસ્થાઓ બાળકો માટે ઊભી કરીને તેમના ભવિષ્યને વધુ ઉજવળ કરવા માટેનો અમારો આ એક પ્રયાસ છે.
