દેશને આઝાદ થયે 74 જેટલા વર્ષો વીતી ગયા, કેટલી સરકારો આવી અને ગઈ, ગતિશીલ ગુજરાતની સરકાર દાવા કરે છે કે આદિવાસી વિસ્તારમાં સર્વાંગી વિકાસ માટે કરોડો રૂપિયા ખર્ચ્યા પરંતુ જમીની સ્તર પર વાસ્તવિકતા કંઈક અલગ છે, છોટાઉદેપુર જિલ્લામાં અંતરિયાળ વિસ્તારોના ગામડામાં પ્રાથમિક સુવિધા, રોડ રસ્તાનો અભાવ જોવા મળી રહ્યો છે. પ્રજાને આજે પણ રોડ રસ્તાની સુવિધાઓ મળી શકી નથી. લોકોને સુવિધા મળી રહે તે અંગે આજેપણ માંગ રહ્યા છે.
છોટાઉદેપુર તાલુકાના પેટિયા ગામથી ઝેર ગામ સુધી ત્રણ કિમીનો નવીન ડામર રોડ, તથા ઝેર ગામે નવા ફળિયામાં મેઈન રોડથી ગમાણ ફળીયા સુધી નવીન ડામર રોડ તથા ઝેર ગામે તોરણ ફળિયાથી સ્મશાન થઈ ગમાણ ફળીયા મેઈન રસ્તાને જોડતો રસ્તો તદ્દન કાચો હોય લોકોને અવર જવર કરવા અર્થે ભારે મુશ્કેલી પડી રહી છે. અત્યાર સુધીમાં આ રસ્તા બન્યા જ નથી. તેમ ગ્રામજનો ફરિયાદ કરી રહ્યા છે. અને ઘણા સમયથી આ ગામના રસ્તા વહેલી તકે બનાવવામાં આવે તેમ માંગ કરી રહ્યા છે.
ઝેર ગામના આગેવાન લાલસિંગભાઈ રાઠવા જણાવી રહ્યા છે કે અમારા ગામના કાચા રસ્તાને કારણે અવર જવર કરવામાં લોકોને ભારે તકલીફ પડી રહી છે. કાચા રસ્તાને કારણે ચોમાસા દરમ્યાન કાદવ કિચચડ થઈ જાય છે જેથી ઇમરજન્સીમાં એમ્બ્યુલન્સને આવા માટે પણ મુશ્કેલ છે, હોસ્પીટલમાં જવા માટે મહામુશ્કેલીનો સામનો કરવો પડતો હોઈ છે ખરીદી અને અન્ય કામ અર્થે અવર જવર કરતી વખતે પડી જવાના બનાવો પણ બનતા હોય છે. અહીંયા ડામર રોડ બનવો જોઈએ તેવી સૌની માંગ છે. કાચા રસ્તાની જગ્યાએ ડામર રોડ બનાવવામાં આવે જે અંગે અમે ઉચ્ચ કક્ષાએ અનેકવાર રજૂઆતો કરી પરંતુ તંત્ર દ્વારા કોઈ ધ્યાન આપવામાં આવતું નથી.
ઉલ્લેખનીય છે કે ગ્રામ જનોની રજૂઆતના પગલે સાંસદ ગીતાબેન રાઠવા દ્વારા પોટિયા ગામથી ઝેર ગામ સુધીનો અને ઝેર નવા ફળિયામાં મેઈન રોડથી ગમાણ ફળીયા સુધી નવીન ડામર રોડ બનાવવા નાયબ મુખ્યમંત્રી નીતિનભાઈ પટેલ, માર્ગ અને મકાન વિભાગને 25 મેના રોજ પત્ર લખી જાણ પણ કરી હતી.
પરંતુ આ અંગે કોઈ કાર્યવાહી થઈ નથી. છોટાઉદેપુર જિલ્લાના અંતરિયાળ ઘણા વિસ્તારોમાં આજે પણ પ્રજાને પ્રાથમિક સુવિધાથી વંચિત છે. તેમ લાગી રહ્યું છે. ગ્રામ્ય વિસ્તારોમાંથી પ્રજાની ફરિયાદો પ્રકાશમાં આવતા ભારે નવાઈ લાગે છે. સરકારી કાર્યક્રમો થવાના હોય નેતાઓ આવવાના હોય ત્યાં તાત્કાલિક નવા રોડ બનાવી દેવામાં આવે છે. પરંતુ ગ્રામીણ અંતરિયાળ વિસ્તારમાં કોઈ ધ્યાન આપવામાં આવતું નથી તેમ લોક ચર્ચા થઇ રહી છે.
