ધરમપુર: વલસાડ જિલ્લાના ધરમપુર તાલુકાના ભાંભા ગામના એક શિક્ષક દંપતીની માત્ર દોઢ વર્ષની પુત્રી રાઠોડ ‘જીવા’એ અપાર પ્રતિભા અને અદ્ભુત સ્મૃતિશક્તિનું પ્રદર્શન કરીને આંતરરાષ્ટ્રીય કક્ષાએ નવો રેકોર્ડ સર્જી વન ઇન અ મિલિયન’નો ખિતાબ મેળવ્યો છે.
ભાંભા ગામના હેમંતકુમાર રાઠોડ અને સ્મિતાબેન રાઠોડની દીકરી જીવાનો જન્મ 29 મે 2024ના રોજ થયો હતો. હાલમાં 1 વર્ષ અને 7 મહિનાની વયે જીવાએ પ્રાણીઓ, પક્ષીઓ, વાહનો, ફળો, શાકભાજી, શરીરના અંગો, વિવિધ વસ્તુઓ, ક્રિયાઓ તેમજ અંગ્રેજી મૂળાક્ષરો અને તેમના ફોનિક્સ (ઉચ્ચાર) સાથે ઓળખીને સ્પષ્ટ રીતે બોલીને સૌને આશ્ચર્યમાં મૂકી દીધા છે. આ અસાધારણ પ્રતિભાને જોતાં ઇન્ટરનેશનલ બુક ઓફ રેકોર્ડ્સે જીવાને ‘સુપર ટેલેન્ટેડ કિડ’ના ખિતાબથી સન્માનિત કરીને ‘વન ઇન અ મિલિયન’ તરીકે સત્તાવાર માન્યતા આપી છે.
જીવાની માતા સ્મિતાબેને જણાવ્યું કે, “જીવા જેવી ઉંમરના અન્ય બાળકો કરતાં તે વધુ સ્પષ્ટ અને વધુ વસ્તુઓ ઓળખે છે અને બોલે છે. તેની આ ક્ષમતા જોઈને અમે ઇન્ટરનેશનલ બુક ઓફ રેકોર્ડ્સમાં નોમિનેશન કર્યું હતું અને તેને આવો બહુમાન મળ્યો તે અમારા માટે ગર્વની વાત છે.”
ધરમપુરના કોઠી ફળિયામાં સાંઈ સૃષ્ટિ એપાર્ટમેન્ટમાં રહેતા આ નાનકડા પ્રતિભાશાળી બાળકે પોતાની અસાધારણ ક્ષમતાથી આખા વિસ્તારમાં ખ્યાતિ મેળવી છે. શિક્ષક માતા-પિતાના સતત માર્ગદર્શન અને પ્રોત્સાહનને કારણે જીવા આટલી નાની ઉંમરે આવી અદ્ભુત સિદ્ધિ હાંસિલ કરી શકી છે. જીવા જેવા બાળકો ભવિષ્યમાં દેશનું નામ વધુ ઉજ્જવળ કરશે તેવી આશા સૌને છે.
