ડાંગ: ડાંગ જિલ્લામાં સતત વરસી રહેલા ધોધમાર વરસાદે જનજીવન અસ્તવ્યસ્ત કરી નાખ્યું છે. જિલ્લા મુખ્યાલય આહવામાં છેલ્લા 24 કલાકમાં 4.61 ઈંચ વરસાદ નોંધાયો છે. સલામતીના ભાગરૂપે જિલ્લા પ્રશાસને તમામ શાળાઓમાં રજા જાહેર કરી છે.બાજ ગામની શાળામાં વરસાદી પાણી ઘૂસી જતાં શૈક્ષણિક સામગ્રીને નુકસાન થયું છે.
Decision News ને મળેલી માહિતી મુજબ બાજ નજીકના પુલ પરનો રસ્તો પાણીના પ્રવાહમાં ધોવાઈ ગયો છે. આહવા–મુલચોંડ માર્ગ પર ઝાડો અને પથ્થરો ખાબકતા વાહન વ્યવહાર બંધ થયો છે.આહવાના પિંપરી ગામમાં જળબંબાકાર સર્જાયો છે. ખાપરી નદીના પૂરથી રોડ સાઈડની દુકાનોમાં પાણી ઘૂસી જતાં વેપારીઓને આર્થિક નુકસાન થયું છે.
ખાતળ–માછલી માર્ગના પુલ પરથી પાણી વહી રહ્યું છે. ચકટીયા ગામમાં પણ વરસાદી પાણી ઘૂસ્યા છે.સુપદહાડથી મોટાબરડા, નાનાબરડા અને સુર્યાબરડા ગામોનો બહારની દુનિયા સાથેનો સંપર્ક તૂટી ગયો છે. ઝાડો અને પથ્થરો રસ્તા પર પડવાથી અનેક આંતરિક માર્ગો બંધ થયા છે. જિલ્લા પ્રશાસન પરિસ્થિતિ પર નજર રાખી રહ્યું છે. નાગરિકોને અતિ જરૂરી કામ સિવાય બહાર ન નીકળવાની સૂચના આપવામાં આવી છે.
