વલસાડ: વલસાડ જિલ્લામાં છેલ્લા 24 કલાકમાં સૌથી વધુ ઉમરગામ તાલુકામાં 74 મિમી વરસાદ નોંધાયો છે. જિલ્લામાં અત્યાર સુધીમાં કુલ સરેરાશ 1747.17 મિમી વરસાદ થયો છે. મધુબન ડેમના ઉપરવાસના 6 ગામોમાં છેલ્લા 24 કલાકમાં કુલ 527 મિમી વરસાદ નોંધાયો છે. ડેમનું જળસ્તર 76.05 મીટર સુધી પહોંચ્યું છે.
આ કારણે ડેમના 10 દરવાજા 1.5 મીટર ખોલીને તબક્કાવાર 1 લાખ ક્યુસેક પાણી દમણગંગા નદીમાં છોડવામાં આવી રહ્યું છે.જિલ્લાના અન્ય તાલુકાઓમાં વરસાદનું પ્રમાણ જોઈએ તો વાપીમાં 34 મિમી, કપરાડામાં 27 મિમી, પારડીમાં 9 મિમી, ધરમપુરમાં 5 મિમી અને વલસાડમાં 3 મિમી વરસાદ નોંધાયો છે. છેલ્લા 24 કલાકમાં સરેરાશ 25.33 મિમી વરસાદ થયો છે.
1લી જૂનથી અત્યાર સુધીનો કુલ વરસાદ જોઈએ તો કપરાડા તાલુકામાં સૌથી વધુ 2267 મિમી, વાપીમાં 1865 મિમી, ઉમરગામમાં 1644 મિમી, પારડીમાં 1607 મિમી, ધરમપુરમાં 1693 મિમી અને વલસાડમાં 1407 મિમી વરસાદ નોંધાયો છે. મધુબન ડેમમાં 48,838 ક્યુસેક પાણીની આવક થઈ છે. નદીના તટ વિસ્તારમાં રહેતા લોકોને સાવચેત રહેવા સૂચના આપવામાં આવી છે. હવામાન વિભાગે દક્ષિણ ગુજરાતમાં ભારે પવન સાથે વરસાદની આગાહી કરી છે.
