વલસાડ: વલસાડના ભાગડાવડા નવી નગરીમાં રહેતાં 30 વર્ષીય પૂત્રએ સગા બાપના ખભાના ભાગે લોખંડની કાતરથી ઉપરા છાપરી ત્રણ ઘા કરી લોહી લૂહાણ કરી મૂકતાં ચકચારી ચકચારી ઘટનામાં સિટી પોલીસે પૂત્રને ઝડપી પાડયો છે. પિતાએ મોપેડ ન આપતાં પૂત્ર સગા બાપ પર તૂટી પડયો હતો.
વલસાડને લાગૂ આવેલા ભાગડાવડા ગામમાં આશાપુરા મંદિરના બાજૂમાં કોસંબા રોડ પર રહેતી દમયંતિબેન અમિત હોસ્પિટલમાં વોર્ડ બોય તરીકે નોકરી કરતાં તેના પતિ સુભાષભાઇ અને 30 વર્ષીય છોકરા સાથે રહે છે.દરમિયાન 9 ઓગષ્ટે સાંજે 5 વાગ્યે પૂત્ર વિશાલે તેના પિતા પાસે મોપેડ માગતાં પિતા કામ અર્થે જવાના હોય તેને ના પાડતા પૂત્ર વિશાલે ઘરમાંથી ખીંટી પર ટાંગેલી લોખંડી કાતર લઇને ધસી આવી પિતાના ખભા ઉપર ઉપરાછાપરી 3 ઘા ઝિંકી દેતા પિતા લોહિલૂહાણ થઇ ગયા હતા.
બુમાબુમ થતા સૌએ દોડી આવી તેમને બચાવી અમિત હોસ્પિટલમાં સારવાર અર્થે દાખલ કરાયા હતા. માતા દમયંતિ બેને તેમના પતિ પર હુમલો કરવા મામલે પૂત્ર વિરૂધ્ધ ફરિયાદ નોંધાવતા સિટી પોલીસે તપાસ હાથ ધરી હતી.જેના અંતે પૂત્ર અમિષને ઝડપી પાડી જેલ ભેગો કરી દેવામાં આવ્યો હતો.
