સુરત: સુરતના ઉધના રેલવે સ્ટેશનના પ્લેટફોર્મ નંબર 6 પર એક ચોંકાવનારો બનાવ સામે આવ્યો છે. જ્યાં રેલવે પ્રોટેક્શન ફોર્સનો એક જવાન બાઈક ચલાવતો નજરે પડયો હતો. આ ઘટનાએ મુસાફરો અને સ્થાનિકોમાં આશ્ચર્ય અને ચર્ચાનો વિષય બની ગયો છે. કારણ કે રેલવે પ્લેટફોર્મ પર વાહન ચલાવવું નિયમોની વિરુદ્ધ છે અને મુસાફરોની સુરક્ષા માટે જોખમી બની શકે છે. હાલ તો આ વીડિયો વાઇરલ થતાં વિભાગીય તપાસ શરૂ થઈ ગઈ છે અને આગામી દિવસોમાં કડક પગલાં લેવાશે.
Decision News ને મળેલી માહિતી મુજબ આ ઘટના ઉધના રેલવે સ્ટેશનના પ્લેટફોર્મ નંબર 6 પર બની, જે પહેલેથી જ મુસાફરોની ભીડ અને મર્યાદિત સુવિધાઓને કારણે ચર્ચામાં રહે છે. આરપીએફ જવાન દ્વારા પ્લેટફોર્મ પર બાઈક ચલાવવાની ઘટના મુસાફરોની સુરક્ષા અને રેલવે વહીવટની જવાબદારી પર સવાલો ઉભા કરે છે. આ ઘટનાને લઈને કેટલાક મુસાફરોએ નારાજગી વ્યક્ત કરી હતી અને રેલવે તંત્ર પાસે આ મામલે તપાસની માંગ કરી છે.
રેલવે સ્ટેશનો પર શિસ્ત અને સુરક્ષાના ધોરણોનું પાલન કેટલું જરૂરી છે તે દર્શાવે છે. ઉધના સ્ટેશન જે સુરત શહેરના મુખ્ય રેલવે સ્ટેશનોમાંનું એક છે, ત્યાં આવી ઘટનાઓથી મુસાફરોમાં અસુરક્ષાની લાગણી ફેલાઈ શકે છે. આરપીએફ જવાન પ્લેટફોર્મ પર બાઈક ચલાવી રહ્યો હોવાની ઘટનાનો વીડિયો વાઇરલ થતા વિભાગીય તપાસ શરૂ કરી દેવામાં આવી છે. વીડિયો ફૂટેજ સાથે રિપોર્ટ બનાવ્યા બાદ આગામી દિવસોમાં આરપીએફ જવાન વિરુદ્ધ કડક પગલાં લેવાય શકે છે.
