વલસાડ: વલસાડ જિલ્લામાં સવારે 6થી 10 વાગ્યા દરમિયાન વરસાદી માહોલ જામ્યો છે. જિલ્લાના તમામ તાલુકાઓમાં વરસાદ નોંધાયો છે. સૌથી વધુ વરસાદ વાપી તાલુકામાં 36 મિમી નોંધાયો છે. ત્યારબાદ ધરમપુર તાલુકામાં 21 મિમી વરસાદ પડયો છે.વાપીના મુખ્ય રેલવે અંડરપાસમાં વરસાદી પાણી ભરાઈ જતાં વાહનચાલકોને મુશ્કેલીનો સામનો કરવો પડયો છે.
Decision news ને મળેલી માહિતી મુજબ માત્ર દોઢ ઈંચ વરસાદમાં જ રેલવે ગરનાળું ભરાઈ જતાં વાહનચાલકોએ મહાનગરપાલિકાની પ્રી-મોન્સૂન કામગીરી સામે સવાલો ઉઠાવ્યા છે. અન્ય તાલુકાઓમાં વરસાદનું પ્રમાણ જોઈએ તો ઉમરગામમાં 16 મિમી, કપરાડામાં 6 મિમી, વલસાડમાં 4 મિમી અને પારડીમાં 2 મિમી વરસાદ નોંધાયો છે.
જિલ્લાના દરિયાકાંઠાના વિસ્તારોમાં ગાજવીજ અને પવન સાથે વરસાદી માહોલ રહ્યો છે.વલસાડ જિલ્લામાં કુલ 85 મિમી વરસાદ ડિઝાસ્ટર વિભાગના ચોપડે નોંધાયો છે. વીજળી અને ભારે પવન સાથે પડેલા વરસાદને કારણે કેરીના પાકની ચિંતા ખેડૂતોમાં વધી છે. મહાનગરપાલિકા જો બાકી રહેલી પ્રી-મોન્સૂન કામગીરી પૂર્ણ કરશે તો આગામી ચોમાસામાં વાપી વિસ્તારના રહીશોને રાહત મળશે.
