વલસાડ:વલસાડ જિલ્લામાં ગરમીનું પ્રમાણ વધી રહ્યું છે. રાજ્ય હવામાન વિભાગની આગાહી મુજબ આજે બપોરે 12થી 5 દરમ્યાન જિલ્લાના તમામ તાલુકાઓમાં તાપમાનમાં 2 ડિગ્રીનો વધારો નોંધાશે. ધરમપુર તાલુકામાં સૌથી વધુ 40 ડિગ્રી તાપમાન રહેશે.
કપરાડામાં 38 ડિગ્રી, વલસાડ અને વાપીમાં 37 ડિગ્રી, પારડીમાં 36 ડિગ્રી અને ઉમરગામમાં 34 ડિગ્રી તાપમાન નોંધાશે. લઘુતમ તાપમાનની વાત કરીએ તો કપરાડામાં 22 ડિગ્રી, વલસાડ-પારડી-ધરમપુરમાં 23 ડિગ્રી, વાપીમાં 24 ડિગ્રી અને ઉમરગામમાં 25 ડિગ્રી રહેશે.વહીવટી તંત્રએ બપોરના સમયે કામ વગર બહાર ન નીકળવા સૂચના આપી છે.
બાળકો અને વડીલોએ વિશેષ સાવચેતી રાખવાની રહેશે. આછા રંગના સુતરાઉ કપડાં પહેરવાની સલાહ આપવામાં આવી છે. હિટ સ્ટ્રોકથી બચવા માટે ઠંડા પાણી, છાશ, લીંબુ પાણી, લસ્સી અને ORSનો ભરપૂર ઉપયોગ કરવા જણાવવામાં આવ્યું છે. પશુપાલકોને પશુ-પક્ષીઓ માટે પાણી અને છાયાની વ્યવસ્થા કરવા અપીલ કરવામાં આવી છે.
